Darıǵa Nazarbaeva málimdeme jasady

Parlament senatynyń tóraǵasy Darıǵa Nazarbaeva palatanyń jalpy otyrysy men komıtet otyrystaryna shaqyrtylatyn adamdardyń sanyn shekteýdi tapsyrdy. 

"О́zderińiz bilesizder, elde tótenshe jaǵdaı jarııalandy. Bul der kezinde qabyldanǵan ári óte qajetti shara. Osy qadamdardy jaqsy túsinemiz. Osyǵan baılanysty tıisti buıryqqa qol qoıdym. Tótenshe jaǵdaı kezeńinde barlyq issaparlar men josparly buqaralyq sharalarǵa tyıym salynady. Al zań shyǵarýshylyq jumys jalǵasady. Biz múmkindiginshe jalpy otyrys pen komıtet otyrystaryna shaqyrtylatyn adamdardyń sanyn shekteýmiz kerek" dedi D. Nazarbaeva.

Darıǵa Nazarbaeva eldegi tótenshe jaǵdaıdyń saldarynan jumyssyz qalatyn azamattardyń máselesin kóterdi. 

"Memlekettiń mindeti - azamattardyń ómiri men densaýlyǵyn saqtaý, ekonomıka men tutyný naryǵynyń qyzmetin qamtamasyz etý. Baıaýlaýǵa bolmaıdy. Azamattardyń tabysy men jumyspen qamtylýyn da únemi nazarda ustaýymyz qajet. Tótenshe jaǵdaı men karantın, ókinishke qaraı, iskerlik belsendiliktiń tómendeýine ákep soǵyp jatyr. Kóptegen adam ýaqytsha jumyssyz qalýy múmkin, tipti kún kórýge aqshasy bolmaıdy" dedi Nazarbaeva. 

Senat apparatynyń 70-ten asa qyzmetkeri úıden jumys istep, al qalǵandary qysqartylǵan jumys kúnine aýysqan. 

"Bizge erteńgi kúnge senimmen qarap, boıymyzdaǵy úreı men kúdikten arylý qajet. Álem jurtshylyǵyna temir hanym dep tanylǵan Margaret Tetcher: "Bizdiń qorqynyshtyń toqsan paıyzy - eshqashan bolmaıtyn nárse týraly" degen. Qazirgi tańda barshamyz bári jaqsy bolatyny týraly oılap, jaqsylyqtan úmittenýimiz kerek. Biz – talaı synda shynyqqan myqty halyqpyz. Biz bárin jeńemiz! Aldaǵy senbi kúni jarqyn merekemiz Naýryz keledi. Bul – kóktem merekesi, jandaný men gúldený meıramy. Úmit pen jańarý merekesi. Barshańyzǵa densaýlyq pen bar jaqsylyqty tileımin! Naýryz bizge bul jyly tek baqyt alyp kelsin, qaıǵy men aýyrtpalyqtan aryltsyn!" dedi Nazarbaeva.

Sondaı-aq Darıǵa Nazarbaeva depýtattarǵa koronavırýsqa qarsy kúres qoryna bir kúndik jalaqysyn aýdarý týraly usynys jasady. 

"Senat depýtattary men apparat qyzmetkerleriniń bir kúndik jalaqysyn vırýspen kúres qoryna aýdarý týraly usynys bar, qarsylyq joq pa? Eger bireý kóbirek bergisi kelse, qarsylyqtar bolmaıdy, qoldaısyzdar ma ?" dedi Darıǵa Nazarbaeva. 

Barlyq depýtattar usynylǵan usynysty biraýyzdan qoldady.