“HALQYMYZ AMAN, JURTYMYZ TYNYSh BOLSYN! BIZ BIRGEMIZ!”

Memleket basshysynyń Qazaqstan halqyna arnaǵan úndeýindegi osy sózderdi tyńdap nemese oqyp qoıa salý azdyq etedi. Onyń keleli oıyna, paıym-tujyrymynyń máni men maǵynasyna zer salǵan jón. El-jurttyń amandyǵy bolmasa jeke bastyń saýlyǵynan, myń san jıǵan dúnıe-múlkińnen ne qaıyr? Jasy bar, jasamysy bar - búkil halyq bolyp zamana, ýaqyt jaýapkershiligin moıynǵa alyp, bılik pen qoǵamdy jumyldyryp, “bir qoldyń salasyndaı” ujymdasyp, álemdik dertke qarsy turý – ári adamzattyq, ári adamshylyq is.

Jasyrǵan aýrý qaýipti. Búkil jahandy dúrbeleńge salyp, aınalasy birer aıda aýyr sarsańǵa salǵan indetke baılanysty Prezıdentimiz otandastardy sabyrǵa shaqyryp qana qoımaı, saqtaný sharalaryn júıelep kórsetip berdi. Qoǵam bolyp qolǵa alǵanda ǵana jedel eńseriletin jón-jobany atady. Tótenshe jaǵdaıda kópshilik adaspas amaldy aıqyndap, senimdi kúsheıtip, úmitti arttyrdy. Sóz joq, bul jolda halyqqa erik-jiger, qajyr-qaırat kerek. Senim – táýekeldiń negizi, ılaný – ıman men parasatqa serik! Eń bastysy, budan da qıyn kezeńderden abyroımen ótýge múmkindik bergen aıryqsha Qazaqstandyq jolymyz, sonyń ishinde jalpyulttyq tatýlyq pen birligimizdiń bary jadymyzda jańǵyrdy.

Memleket – qashanda halyq arqa súıeıtin tegeýrindi kúsh. Sondyqtan qıyndyqtyń aldyn alatyn tıisti qarjy, áleýet qarastyrylyp otyr. Osy rette ekonomıka turaqtylyǵy men barlyq áleýmettik mindettemelerdiń oryndalýy saqtalatynyna, otandyq kásipkerlerdi qoldaýǵa, jumys oryndaryn ashýǵa 300 mıllıard teńge bólinetinine kepildik berildi. О́zge de qajetti qaraketter anyqtalyp, kózdelgen jospardy aıqyndap-baqylaıtyn, mańyzdy jumystardy úılestiretin komıssııa jasaqtaldy.

Árıne, mundaı kezde aýrýdy juqtyrǵanyn jasyrǵandar, zárý medısınalyq buıymdardy qymbatqa satýdy kózdeıtin alaıaqtar, úreı shaqyryp, arandatýǵa baǵyttalǵan qaýeset, alyp-qashpa aqparat taratatyndar ushyrasýy ábden múmkin. Ondaı zalal, qaýip týdyratyndar tótenshe jaǵdaıǵa laıyq qatań jazaǵa tartylady. Bul – órkenıetti elimizdiń abyroıyn, azamattardyń quqyǵyn qorǵaýǵa baǵyttalǵan zańdyq shara. Qaı zamanda da syn saǵattarda kópshiliktiń jaı-kúıine shyn alańdaıtyn, retine qaraı qaıyrmaldyq jasaýǵa tyrysatyn eldiń esti azamattary men dara tulǵalary bolady. Osy jomart ta baıandy dástúrimizdiń bul joly da eldik isterdi qoldap-súıemeldeıdi dep senemiz. Máselen, qazir astanadan aýylǵa deıin asa zárý tumshamen (maska) qamtamasyz etýge qarjylaı úles qossa nemese volonterler jalǵyzilikti qarııa kisilerge, ózge de muqtaj jandarǵa jan qalaýymen qol ushyn berse, qandaı laıyqty qareket bolar edi. Muny jarnamasyz júzege asyryp jatsa, jaqsylyǵy jerde qalmas degen pikirdemiz.

Jalpy, indetpen kúreske baılanysty barlyq is-shara borysh pen adamgershilikti, tııanaqtylyq pen tártipti talap etedi. Prezıdent memlekettik qoldaýdyń bári qoldanystaǵy zańdarymyzdyń sheginde júzege asyrylatyn málim etti.

Densaýlyqqa qatysty jaýapty kezeńde halyqtyń úmiti – medısına qyzmetkerlerinde. Olardyń kásibı eńbegi men alǵaýsyz kómegin árbir azamat sezinýi qajet. Al, aq halatty abzal jandar da osy joly ózderiniń azamattyq pozısııasyn, quqyqtyq mádenıetin tanytady dep senemiz.

Degenmen de barynsha saqtyq pen saqtaný ózimizge baılanysty. Halyqtyń amandyǵyn oılasaq, ózimizdiń, jaqyndarymyzdyń densaýlyǵyna qam jesek, jeke tazalyq pen tártipti – eldiń tazalyǵy men tártibi deńgeıinde qabyldaı bilýge tıistimiz. Bizdiń ıakı Otanymyzdyń salamattylyǵy – árbirimizdiń qolymyzda. Nıet te, júrek te, qol da, qoǵam da taza jáne salamatty bolǵaı!

Darhan MYŃBAI
Májilis depýtaty