Toı jasaǵan túrkistandyq jazalandy

Tótenshe jaǵdaı kezinde toı jasaǵan túrkistandyq jazalandy, - dep habarlaıdy Tengrinews.kz tilshisi qalalyq polısııa departamentine silteme jasap.

17 naýryzda áleýmettik jeliler men messendjerlerde úıiniń aýlasynda belgisiz tulǵanyń adamdardyń basyn qosyp, toı jasap jatqan beınejazbasy taraldy. Bul derek boıynsha Túrkistan qalalyq polısııa basqarmasynyń qyzmetkerleri shuǵyl izdestirý sharalaryn qabyldady. 

Polıseılerdiń aıtýynsha, oqıǵa 16 naýryzda túngi ýaqytta Túrkistan qalasyndaǵy móltek aýdandardyń birinde bolǵan.

"Qalalyq polıseıler tótenshe jaǵdaı rejımin buzyp, jıyn ótkizgeni úshin toı ıesine qatysty QR Ákimshilik - quqyq buzýshylyq týraly kodekstiń 476-baby boıynsha ákimshilik hattama toltyrdy", delingen habarlamada.

Osyǵan baılanysty vedomstvo ókilderi zańǵa baǵyný keregin eskertedi. Tótenshe jaǵdaı kezinde jıyn, basqosýlardy uıymdastyrmaı, múmkindiginshe saqtyq sharalaryn jasap, densaýlyqqa mán berý qajet ekenin aıtady.