"Nur-Sultanda koronavırýs juqtyrǵandarmen baılanysta bolǵandardyń bári tabyldy"

Elordada koronavırýs juqtyrǵandarmen baılanysta bolǵan turǵyndardyń bári tabyldy. Bul týraly Nur-Sultan qalasynyń ákimi Altaı Kólginov aıtty. 

– Memleket basshysy Qasym-Jomart Toqaevtyń jarlyǵyna sáıkes, tótenshe jaǵdaı engizilgeni belgili. Koronavırýs indetiniń óte jyldam taralýyna baılanysty álemniń birneshe elinde tótenshe jaǵdaı jarııalanǵanyn bilesizder. Mundaı qysyltaıań kezeńde Nur-Sultan qalasynda nysandar qalaı jumys isteıtini týraly aıtyp berýge ruqsat etińizder. Búgingi tańda qalada koronavırýspen aýyrǵandar sany 17 adamǵa jetti. Sol sebepten biz qaýipsizdik sharalardy kúsheıttik. Bul azamattarmen qarym-qatynasta bolǵandardyń barlyǵy tabyldy. Olar arnaıy oryndarǵa jatqyzyldy. Sonymen qatar zerthanalyq zertteýler júrgizilýde, – dedi Kólginov.

Qala ákiminiń aıtýynsha, 28 qańtar men 16 naýryz aralyǵynda stasıonarda 752 adam jatqyzyldy. Qazir onda 318 pasıent karantınde jatyr.

– Dıagnostıka jasap, emdeý úshin 1051 orynǵa arnalǵan arnaıy medısınalyq oryn belgilendi. Qajet bolǵan jaǵdaıda qosymsha osynsha oryn daıyndaımyz. Medısınalyq qyzmetkerler koronavırýs ınfeksııasyn juqtyrdy degen kúdigi bar pasıenttermen jumys isteýdiń naqty is-áreket tártibin jaqsy biledi. Olarǵa qazirgi tańda úlken salmaq túsýde. Sondyqtan qala turǵyndary men qonaqtaryn medısınalyq qyzmetkerlerdi qoldaýǵa shaqyramyn. Medısınalyq uıymdar dári-dármekpen, basqa da qajetti zattarmen tolyqtaı qamtamasyz etilgen, – dep aıtty qala ákimi.