• USD 468.56

  • EUR 497.56

  • RUB 7.3

  • CNY 67.18

29 Naýryz, 10:46:30
Almaty
+35°

17 Naýryz, 2020 Saıasat

Qazaqstanda mınıstr men depýtattyń qaısysy ótirikshi?

Taqyrypty dál bulaı qoıýymyzǵa kúni keshe mal sharýashylyǵyndaǵy jaǵdaı "qabyrǵany qaıystyrarlyqtaı" dep málimdegen Májilis depýtaty Saýytbek Abdrahmanov pen búgin Úkimet otyrysyndaǵy úlken kresloda QR Aýylsharýashylyǵy mınıstri Saparhan Omarov aıtqan "Etti mal sharýashylyǵy men qoı sharýashylyǵy salalarynyń damý áleýeti zor" degen "zor" pikirler sebep bolyp otyr.

Foto: ashyq aqparat kózderinen

Áýeli Abdrahmanov bir kún buryn Úkimet saǵatynda Keńes armııasynyń shırek bóligine jýyǵyn etpen qamtamasyz etken Qazaqstan qazir syrttan et satyp alatyn memleketke aınalǵanyn atap ótken.

Dálme-dál: 

– Bul – qabyrǵa qaıystyratyn jaǵdaı. Faktiniń aty fakt. Keńes armııasynyń shırek bóligine jýyǵyn etpen qamtamasyz etken Qazaqstan qazir syrttan et satyp alatyn memleketke aınaldy. Qazir elde azyq-túlik daıyndaýda jeke sektordyń úlesi tıimdi paıdalanylyp otyrǵan joq, – dedi ol.

Bir árpin de ózgertpeı qaıtalasańyz depýtat: "Qazaqstan qazir syrttan et satyp alatyn memleketke aınaldy" dep tur. "M-m-m" dep ymyrasyz ashýǵa basar ma edińiz sosyn. "Qurtty" dep qutyńyz qasha surlanyp sybap-sybap alar ma edińiz kep-kep Aqorda tóńiregin.

Bundaıda Saparhan Omarovtyń Qazaqstanda mal sharýashylyǵy órkendep tur degenge saıatyn álgi bir pikiri "biraq" degizedi. Sóıtsek, Májilis depýtatynyń qabyrǵasy qaıysqan máselege bildeı Aýylsharýashylyǵy mınıstriniń de aıtar ýáji daıyn eken. Ony da tyńdap kórińiz.

– Etti mal sharýashylyǵy men qoı sharýashylyǵy salalarynyń damý áleýeti zor. Munda otbasylyq fermerlik sharýashylyqtar óndiris modeliniń negizi bolady. Olar ótkizý, oqytý jáne veterınarlyq qyzmet kórsetý máselelerinde birigedi. Jer ústi jáne jer asty sýlarymen qamtamasyz etilgen jaıylym, aýyl halqy túrindegi eńbek resýrstary sııaqty barlyq qajetti resýrstar elimizde etti mal sharýashylyǵy salasyn damytý úshin jetkilikti jáne salany ınvestısııalyq tartymdy etedi, – deıdi mınıstr.

Jer asty, jer ústi sýlaryna deıin esepke alyp, eńbek resýrsy dep aýyl halqyn aıryqsha ataǵan mınıstrdiń shyrqyryǵan "shyndyǵy" bul. Iаǵnı, ınvestorlardyń ózi úımelerdeı tartymdy salada etti mal sharýashylyǵyn damytý jónindegi sharalardyń iske asyrylýy malshy fermerlerdiń jańa sanatyn qurýǵa múmkindik beredi dep otyr taǵy.

"Aýyl halqy eńbek resýrsy" degennen shyǵady, bul rette de atalǵan vedomstvo basshysynyń sózi májilismenniń málimdemesine "qarsy" aıtylyp tur. Máselen deısiz ǵoı:

"Aýyldaǵy azamattardyń mal ósirýge degen motıvasııasy tómendep ketti. Birinshi motıvasııa – kúndelikti iship-jem, ekinshi motıvasııa – toıǵa mal jınaý. Úshinshi motıvasııa– qonaq kútý. Odan artylatyn maldyń aýyl adamyna qajeti shamaly bolyp tur. О́ıtkeni, ol maldy naryqqa qosyp, aqshaǵa aınaldyra almaıdy. Aýdan ortalyqtarynyń janynda turǵan adamdar bolmasa, 100-200 km qashyqtyqta turatyndardyń maldy qalaǵa ákep ótkizetin múmkindigi joq, – deıdi májilis depýtaty.

Baqsańyz, ekeýi de Úkimette aıtyp otyr bul ózara súrine-qabyna "súzisken" pikirlerdi. Araǵa bir kún salyp. Biri mal sharýashylyǵy damyp jatyr dep, aýyl halqyn eńbek resýrsy retinde aıryqsha atasa, kelesi biri – bul salanyń sharýasy shatqaıaqtap turǵanyn, aýyl halqynyń mal baǵýǵa esh qulyq tanytpaı otyrǵanyn aıtady. 

Sosyn, senińiz-senbeńiz mınıstrlik ókili: fermerlik sharýashylyqtar sanyn 20 myńnan 65 myńǵa deıin ósýine, iri qara mal sanynyń 7,4 mln bastan 11,2 mln basqa deıin artýyna, qoı sanynyń 19,1 mln bastan 24,3 mln basqa deıin kóbeıýine, sıyr eti men qoı etin óndirý kóleminiń 672 myń tonnadan 902 myń tonnaǵa deıin ulǵaıýyna yqpal etedi degen. Mal sharýashylyǵyn damytý jónindegi sharalar týraly áńgimesinde.

Endi ekeýdiń "aıtysyn" osy aradan úze turyp, mınıstrlik ókili ataǵan sıfrlarmen maqalanyń túıinin qoısaq deımiz.

Baıqaýymyzsha, halqynyń sany mıllıondarmen eseptelip otyrǵan sizdiń táýelsiz Qazaqstanyńyz úshin mal sharýashylyǵynda da mıllıondarmen maqtaný ǵana qalyp turǵanǵa uqsaıdy. Tek qazaqty ǵana esepke alyp (mólshermen dál qazir kemi 10 mıllıon qazaq bar – Q.Q.) ora-sholaq esep jasasańyz da bir adamǵa shamamen bir bas sıyr eki qoı tıesili bolmaq (mólshermen dál qazir kemi 10 mıllıon qazaq bar – Q.Q.). Bul qazaqtyń jyldyq azyǵy turypty, bir qystyq soǵymynan aspaıtyn mólsher degen sóz...

Taqyryp boıynsha: "Qabyrǵa qaıystyratyn jaǵdaı": Májilis depýtaty bar shyndyqty aıtty

Qozybaı Qurman

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir