Tótenshe jaǵdaı kezinde kimder qashyqtan jumys isteýge mindetti, olarǵa jalaqy qalaı tólenedi?

Qazaqstanda tótenshe jaǵdaı kezinde qashyqtan jumys isteý múmkindigi bar barlyq kásiporyndar men mekemeler osy rejımge aýysýǵa mindetti. Bul týraly Qazaqstannyń eńbek jáne halyqty áleýmettik qorǵaý mınıstri Birjan Nurymbetov aıtty. 

Nurymbetovtyń sózinshe, Eńbek kodeksine saı, kásiporyndar men mekemeler qashyqtan jumys isteý rejımine kóshken jaǵdaıda jumys berýshi jumysshyǵa dál burynǵydaı jalaqy tóleýge tıis. 

– Qashyqtan jumys isteý rejımine kóshkende, eńbekaqy tóleý tártibi ózgermeıdi. Bul jerde azamat óziniń jumys ornynda emes, úıden jumys atqarý múmkindigi bolady. Eńbek kodeksi boıynsha, oǵan jumys berýshi tıisti jaǵdaı jasaýǵa mindetti jáne jalaqysy aı saıynǵy alyp júrgen kólemde tólenetin bolady, – dedi Nurymbetov.

Mınıstrdiń aıtýyna qaraǵanda, tótenshe jaǵdaı kezinde jumys kólemi shekteletindeı bolsa, jumys berýshiler ózderiniń buıryǵymen qysqartylǵan jumys rejımine kóshýge quqyly. Olaı bolǵan jaǵdaıda, jumysshylar jumys istegen saǵatyna qaraı eńbekaqy alatyn bolady. 

– Eger de jumys kólemi shekteletin bolsa, jumys berýshiler ózderiniń buıryǵymen qysqartylǵan jumys rejımine kóshýge quqyly. Munda aptadaǵy jumys kúnderiniń sany nemese bir kúndegi atqarylatyn jumys saǵaty azaıýy múmkin. Nemese jumys kúnimen birge, saǵat ta azaıýy yqtımal. Bul jaǵdaıda jumys istep júrgen azamattar saǵatyna qaraı eńbekaqy alatyn bolady. Iаǵnı, mysaly aptasyna jumys kúni bes kúnnen úsh kúnge qysqartylsa, aptasyna úsh kúndik jalaqyny alady. Nemese bir kúnde segiz saǵattyń ornyna tórt saǵat jumys atqarylsa, tórt saǵattyń jalaqysy mindetti túrde tólenetin bolady. Tolyq emes jumys kúni Eńbek kodeksiniń 70-babymen retteledi, – dedi mınıstr. 

Keshe Qazaqstan prezıdenti Qasym-Jomart Toqaev COVID-19 koronavırýsyna baılanysty eldiń barlyq aýmaǵynda 16 naýryz ben 15 sáýir aralyǵynda tótenshe jaǵdaı jarııalaǵan bolatyn. 

Resmı derek boıynsha, Qazaqstanda 10 adamnan koronavırýs tabyldy.