"Jyrqyldap án salatyn ýaqyt emes": Meırambek Besbaev koronavırýsty ázilge aınaldyrǵandardy synady

Belgili ánshi Meırambek Besbaev qazaqstandyqtardy prezıdent jarlyǵynda aıtylǵan shekteý sharalaryna jaýapkershilikpen qaraýǵa shaqyrdy, dep habarlaıdy Qamshy.kz aqparat agenttigi.

Bul týraly ánshi Instagram jelisinde arnaıy jazba da qaldyrǵan.

"Elimizge kelgen aty jaman vırýstyń qaýpi óte kúshti bolyp tur. Biz áli de mán bermeı júrgen sııaqtymyz. Úkimet barlyq is-sharany tolyǵymen toqtatty. Jekelegen toı- tomalyǵymyzdy da keıinge qaldyrǵany durys boldy", - dep jazdy ol.

Sondaı-aq ánshi ótkir derttiń ózin arzan ázilge azyq qylyp júrgenderdi "túırep" ótken.

"Qýanyshymyzdy bólisemiz dep júrip, qaıǵyǵa urynyp qalmaıyqshy. Osy synaqtan aman-esen ótip alýdyń amal-shartyn qarastyrǵanymyz jón», - dep jazdy koronavırýsty kúlkige aınaldyryp júrgenderdiń áreketin synǵa aldy. «Aǵaıyn-týǵannyń amandyǵyn oılaıyq. Dál qazir koronavırýsty kúlkige aınaldyryp, ázil aıtatyn, jyrqyldap án salatyn ýaqyt emes. Aıtylyp jáne jazylyp jatqan keńesterge qulaq túreıik. Men úshin qazaǵymnyń amandyǵy bárinen joǵary. Álemniń alpaýyt elderin jaıpap kele jatqan indet shyndap kirisse bizdi de aıamaıdy. Qudaı bárimizge qýat berip jaqsy kúnde jolyǵýdy jazsyn!», - dep túıindegen "Muzart" tobynyń múshesi.