Osy apta elimiz úshin ońaı bolǵan joq. Munaı baǵasy kúrt quldyrap, álemdik ekonomıka aýyr soqqy aldy. Onyń zardaby bizge de tıdi. Qazaqstanda jahan jurtyn dúrliktirgen koronavırýs indeti tirkelip, dertti juqtyrǵandar tabyldy.⠀

Degenmen, dúrbeleń týǵyzyp, áýre-sarsańǵa salynýǵa esh negiz joq. Memleket basshysy eldiń ekonomıkalyq ahýalyn retteý úshin keńes ótkizip, tıisti organdarǵa naqty tapsyrmalar berdi. Soǵan sáıkes, birqatar tıisti sheshim qabyldandy. Eń bastysy, memleket barlyq áleýmettik mindettemelerin oryndaýdy toqtatpaıdy.⠀

Indettiń keń kólemde taralmaýy úshin qajetti jumystar qolǵa alyndy. Shuǵyl áreket etý shtaby qurylyp, tıisti sharalar kúsheıtildi. Barlyq is-áreket Prezıdenttiń tikeleı baqylaýynda. Osy oraıda bul kezeńnen súrinbeı ótýge árqaısymyz jaýapty ekenimizdi erekshe atap ótkim keledi. Sondyqtan ózimizdi, otbasymyzdy, ortamyzdy qorǵaý úshin qabyldanǵan shekteýlerdi durys túsinip, basty nazarda ustaıyq.⠀

Biz budan da qıyn kezeńderdi bastan ótkerip, san túrli zaýaldy eńsergen halyqpyz. Sonyń bárinde bekem birlik pen berekeli tirliktiń eren úlgisin kórsettik. Bul joly da dál solaı bolaryna senimdimin jáne búgingi Amal merekesinde sony tileımin!⠀

Osy rette barshańyzdy yntymaqqa shaqyryp, izgilikke úndeıtin merekemen shyn júrekten quttyqtaımyn! Áz-Naýryzdyń jarshysyndaı bolǵan meıram ár shańyraqqa shattyq pen qýanysh ákelsin! Qazaq eli qaýip-qaterden aman bolyp, máńgi jasasyn!

Máýlen Áshimbaev

Prezıdent ákimshiligi jetekshisiniń birinshi orynbasary

Facebook paraqshasynan

 

Ilmek sózder: Máýlen Áshimbaev

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir