13 Naýryz, 2020 NEWS

Aqordada Shuǵyl áreket etý shtabynyń otyrysy ótti

Foto: Aqorda saıty

Prezıdent Qasym-Jomart Toqaevtyń tóraǵalyǵymen Shuǵyl áreket etý shtabynyń keńesi ótti. Oǵan Úkimettiń jáne birqatar memlekettik organnyń basshylary qatysty, – dep habarlady Aqorda saıty.

Memleket basshysy álemniń jahandyq ekonomıka men geosaıası ahýaldy qaıta ózgertýdiń kúrdeli kezeńin bastan keshirip otyrǵanyn atap ótti. Qazaqstannyń aldynda múldem jańa talaptar kezeńinde ekonomıkany ornyqty damý rejıminde saqtaý mindeti tur.

Premer-Mınıstr Asqar Mamın el ekonomıkasyna keri áser etetin syrtqy faktorlardy azaıtýǵa baılanysty Úkimettiń qabyldap jatqan sharalary týraly baıandady.

Qasym-Jomart Toqaev koronavırýstyń taralýyna qarsy kúres jónindegi sheshimniń aqtalǵanyn jáne der kezinde qabyldanǵanyn, onyń otandastarymyzdyń densaýlyǵyn saqtaýǵa baǵyttalǵanyn atap ótti. Prezıdent kásiporyndar men mektepke deıingi mekemeler qyzmetkerleriniń medısınalyq qaýipsizdigin qamtamasyz etýge qatysty qosymsha sharalar qabyldaý qajet dep sanaıdy.

Memleket basshysy balalaryna qaraý úshin úıinde otyrýǵa májbúr ata-analardyń birine aqyly eńbek demalysyn berý qajettigin jumys berýshilerge túsindirýdi tapsyrdy. Úkimet fıskaldy mehanızmder arqyly kásiporyndarǵa qoldaý kórsetý sharalaryn qabyldaýy kerek.

Prezıdent medısınalyq mekemeler men azamattardy dári-dármektermen qamtamasyz etý máselesin shuǵyl sheshýdi, medısınalyq nysandardyń daıyndyǵyn tekserýdi talap etti.

Memlekettik qyzmetshiler men basqa da laýazymdy tulǵalardyń shetelderge issaparmen barýyna tyıym salynady, tek azamattarymyz ben elimizdiń qaýipsizdigin qamtamasyz etýge baǵyttalǵan saparlarǵa ǵana ruqsat beriledi.     

Prezıdent elimizdiń áleýmettik-ekonomıkalyq damýyna jáne bıýdjet shyǵyndaryna qatysty boljamdy qysqa merzimde qaıta qaraýdy tapsyrdy.

Memleket basshysynyń pikirinshe, bıýdjet shyǵyndaryn halyqty jumyspen qamtýǵa, shaǵyn jáne orta bıznesti qoldaýǵa baǵyttap, qaıta qaraý kerek.

Prezıdent Úkimetke, eń aldymen, otandyq ónim óndirýshilerge basymdyq bere otyryp, taýarlar men qyzmet túrlerin satyp alýdyń tikeleı jáne ashyq júıesine kóshýdi tapsyrdy.

Úkimet otandyq iri kásiporyndarmen birlesip, óndiristi qoldaý jáne keńeıtý, jumys oryndaryn saqtaý boıynsha daǵdarysqa qarsy maqsatty jospar ázirleıdi.

Memleket basshysy otandyq taýarlardy jáne jumys kúshin paıdalana otyryp, ınfraqurylymdardy jóndeýdi, áleýmettik nysandar men jergilikti joldar salýdy kózdeıtin Jumyspen qamtýdyń jol kartasyn júzege asyrýǵa keminde 300 mıllıard teńge bólý jóninde tapsyrma berdi.

Qarjy naryǵyn retteý jáne damytý agenttigine Ulttyq bankpen birlesip, qazaqstandyq bızneske nesıe berý kólemin azaıtpaý jóninde sharalar qabyldaýǵa tapsyrma berildi.

Aımaq ákimderi azyq-túlik pen qyzmet túrleriniń baǵasyn baqylaý jumystaryn belsendi júrgizýi kerek.

Sonymen qatar Prezıdent memlekettik organdardy jekelegen taýarlardyń suranysyna dúrbeleń týdyrmaı, bos úreı men alyp-qashpa sózdiń aldyn alý úshin aqparattyq-túsindirý jumystaryn belsendi júrgizýge, onyń ishinde, áleýmettik jelilerge aıryqsha kóńil bólýge shaqyrdy.

Qasym-Jomart Toqaevtyń aıtýynsha, elimizdiń azyq-túlik qory Qazaqstan halqynyń qajettiligin tolyq qamtamasyz ete alady, tutyný taýarlaryna qatysty eshqandaı tapshylyq bolmaıdy.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir