Prezıdent jumys kestesine ózgeris engizildi

Prezıdenttiń baspasóz hatshysy memleket basshysynyń jumys kestesi týraly aıtyp berdi. Bul týraly prezıdenttiń baspasóz qyzmetiniń hatshysy Berik Ýálı habarlady.

– Árıne, koronavırýstyń álemge taralýy jaǵdaıy Memleket basshysynyń jumys kestesine de áser etti. Buǵan deıin habarlaǵanymyzdaı, pandemııaǵa qarsy aldyn-alý sharalary aıasynda Prezıdenttiń qatysýy josparlanǵan birqatar sharalar toqtatyldy. Onyń ishinde Naýryzdy toılaý, Uly Otan soǵysyndaǵy Jeńistiń 75 jyldyǵyna arnalǵan parad bar. Buǵan deıin Memleket basshysy 8 naýryzǵa arnalǵan saltanatty jıyn men merekelik konsertti de toqtatqan bolatyn. Munyń barlyǵy azamattardyń qaýipsizdigi men saýlyǵy úshin jasalýda, – dedi Berik Ýálı.

Onyń aıtýynsha, Prezıdenttiń halyqaralyq kezdesýler kestesine de ózgerister engizildi.

– Qazirgi ýaqytta álem boıynsha saparlar, ekijaqty jáne kópjaqty kezdesýler, kelissózder toqtatylyp jatyr. Sondyqtan, Qazaqstanda da birqatar syrtqy saıası sharalar, onyń ishinde Dúnıejúzilik saýda uıymyna múshe elderdiń mınıstrleriniń kezdesýi syndy jıyndar keıinge qaldyrylyp nemese toqtatylyp jatyr. Sonymen birge, Prezıdenttiń jumys kestesiniń bosap qalmaǵanyn da atap ótken jón. Pandemııa bizdiń ulttyq múddelerimizdi qozǵaıtyn ekonomıkaǵa, qarjyǵa jáne halyqaralyq qatynastarǵa yqpal etýde. Sondyqtan Memleket basshysy jańa synaqtar men qaýip-qaterler jaǵdaıyndaǵy eldiń strategııalyq damý máselelerin sheshýge mán berip otyr. Sonymen birge, ol jedel áreket etýge kóbirek kóńil bóledi: jınalystar men kezdesýler ótkizedi, jaǵdaıdy qadaǵalaıdy jáne tıisti vedomstvolardyń jumysyn turaqty baqylaýda ustap otyr, – dedi B. Ýálı.