Apta aıqaıy: Birtanov Bekshınniń koronavırýs týraly daýly boljamyna pikir bildirdi

Bul týraly QR Densaýlyq saqtaý mınıstri Facebook-tegi paraqshasynda jazdy, dep habarlaıdy Qamshy.kz aqparat agenttigi. 

«Qurmetti dostar! Álem boıynsha koronavırýs ınfeksııasy 115 elge taraldy. Olardyń arasynda bizge kórshiles memleketter jáne tikeleı áýe qatynastaryn ornatqan elder de bar. Sonymen birge, bárimiz syrtqy álemnen tolyq oqshaýlanýdyń múmkin emestigin túsinemiz. Elimizdiń aýmaǵyna ınfeksııanyń enýi yqtımal ekenin de joqqa shyǵarmaımyz», - dep jazdy mınıstr

Birtanov sonymen birge, QR Bas memlekettik sanıtarlyq dárigeri Jandarbek Bekshınniń koronavırýs ınfeksııasynyń kelýi týraly boljamynyń ǵalymdardyń statıstıkalyq modeldeý arqyly jasaǵan boljamy ǵana ekenin jetkizdi. 

"Bastapqy derekter retinde álemniń túrli elderinde jolaýshylar tasymaly men koronavırýs ınfeksııasynyń taralý kólemi alyndy. Túrli syrtqy faktorlardy eskere otyryp, derekterdiń únemi ózgerip otyratyndyǵyn atap ótken jón. Máselen, bedeldi Lanset jýrnalynda koronavırýstyń Qytaıdan álemdik megapolısterge taralýy týraly uqsas boljam jasaldy», - deıdi Eljan Birtanov.

Budan bólek mınıstr ǵalymdar usynǵan ssenarııdiń iske aspaýy da múmkin ekenin atap ótken óz jazbasynda:

«Taǵy da málimdeımin, Qazaqstanda búgingi kúnge deıin koronavırýstyq ınfeksııa rastalǵan joq», - dedi ol.

Eske sala keteıik, buǵan deıin QR bas sanıtar dárigeri Jandarbek Bekshın naýryz aıynyń 11-16 aralyǵynda Qazaqstanda koronavırýs tirkelýi múmkin ekenin aıtqan bolatyn.

Ári qaraı oqyńyz: "Bulaı qalaı boljaýǵa bolady??? Vırýs – quda emes qoı"