10 Naýryz, 2020 Barlyq aımaqtar

Atyraý Qazaqstandy áli asyrap tur

Búgin de ádettegideı úkimet otyrysy ótti. Munaıdyń muńy, dollardyń dońaıbaty, teńgeniń teris aınalǵan telpegi de otyrystyń ózekti taqyrybyna aınaldy. Sonyń ishinde Ulttyq ekonomıka mınıstri Rýslan Dálenov aıtqan dáleldi bir jaıt oılandyrmaı qoımady bizdi.

Foto: ashyq aqparat kózderinen

Máselen, atalǵan jıynda QR Ulttyq ekonomıka mınıstri Qazaqstannyń eń kóp ınvestısııa salynyp jatqan óńirin atap qaldy. Aýzynan jazyp-jazbaı. Saldaryn bilip-bilmeı.
 
Onyń aıtýynsha, osy jylǵy qańtar-aqpan aılarynda Qazaqstan ekonomıkasyna 1,5 trln teńge ınvestısııa salynypty. Nátıjesinde el ekonomıkasyna enersııa berýi qomaqty demeýqarjynyń jartysy munaıly óńir – Atyraý oblysyna tartylǵan eken. 
 
Áýeli Rýslan Dálenovtyń dáıek sózin qaz-qalpynda bersek: 
«Osy jylǵy qańtar-aqpan aılarynda ekonomıkaǵa 1,5 trln teńge ınvestısııalandy. Salynǵan ınvestısııalardyń jartysy Atyraý oblysyna tıesili», - deıdi ol Úkimet otyrysynda.
 
Aına-qetesiz "salynǵan ınvestısııalardyń jartysy Atyraý oblysyna tıesili" dep tur. Iаǵnı, bundaı bolǵanda "munaı astanasy" áli de ekonomıkalyq turǵyda "saýyn sıyr" qyzmetin minsiz atqaryp keledi degen sóz.
 
Bundaı bolǵanda, ekonomıkasy "ártaraptanyp" jatyr, óńirler "órkendep" barady delingen "haos" Qazaqstannyń kezekti bir shyndyǵy ashylyp qaldy degen sóz. 
 
Bylaısha aıtqanda, Atyraý áli Táýelsiz Qazaqstandy asyrap, "lokomotıv" degen laqap atynan aınymaýda. Aýylsharýashylyǵy boıynsha aldyńǵy orynǵa shyqty degen Almaty oblysy da, Kómir óndirisinen kósegesi kógerip keledi degen Qaraǵandy da, artyq baılyǵy – astaýynan asyp astyǵy qar astynda qalýda delingen soltústik oblystar da ınvestorǵa "qyzyqsyz" degen sóz bul. 
 
Nege qyzyqsyz bolmasyn deısiz keıip: qazba baılyǵyn káris pen úndis, ýranyn orys kúndelikti "obed" úshin kertip jep otyrǵanda. Altyny jekeniń jambasynda jatqanda...
 
"Qyzyqsyz" demekshi, ótken aıdyń sońynda álemdik aqparat deregi boıynsha bıznes klımatta Qazaqstannyń ınvestorlar úshin "tartymy" azaıyp bara jatqany aıtylǵan bolatyn. Oǵan eldegi ekonomıkalyq ahýal túıtkilderi men Qytaıdaǵy koronavırýstyń da "salqyny" áser etkeni aıtylǵan.
 
Demek, eldegi bıznes klımat túbegeıli jaqsarmaı sheteldik ınvestısııanyń Atyraýdyń daıyn "tabaǵyna" úımelegeni-úımelegen de, jalpaq Qazaqstannyń solardyń "sarqytyna" telmirgeni telmirgen dersiz.
Qozybaı Qurman

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir