QR Premer-Mınıstri Asqar Mamınniń tóraǵalyǵymen ótken Úkimet otyrysynda Qazaqstan Respýblıkasynyń 2020 jylǵy qańtar-aqpandaǵy áleýmettik-ekonomıkalyq damýynyń qorytyndysy jáne respýblıkalyq bıýdjettiń atqarylýy qaraldy.

Ekonomıkanyń, bank salasynyń jaı-kúıi, respýblıkalyq bıýdjettiń oryndalýy, memlekettik satyp alýdaǵy jergilikti qamtý týraly QR ulttyq ekonomıka mınıstri R. Dálenov, Ulttyq Bank tóraǵasy E. Dosaev, Premer-Mınıstrdiń Birinshi orynbasary – qarjy mınıstri Á. Smaıylov, eńbek naryǵyndaǵy jaǵdaı jáne ınfraqurylymdyq jobalardy iske asyrý týraly QR eńbek jáne halyqty áleýmettik qorǵaý mınıstri B. Nurymbetov, sondaı-aq ındýstrııa jáne ınfraqurylymdyq damý birinshi vıse-mınıstri Q. О́skenbaev baıandady.

Osy jyldyń qańtar-aqpanynda JIО́ ósimi 2019 jyldyń sáıkes kezeńine qaraǵanda 3,3% qurady. Negizgi kapıtalǵa salynǵan ınvestısııalar 11,6%-ǵa, onyń ishinde jeke ınvestısııalar 12,1%-ǵa ósti. Inflıasııa 6% maqsatty dálizde saqtalady.

Ekonomıkanyń shıkizattyq emes salalary, onyń ishinde avtomobıl jasaýdy (72,2%) jáne jeńil ónerkásipti (12,4%) qosa alǵanda, óńdeýshi ónerkásip – 9,4%-ǵa, qurylys – 11,9%-ǵa ósim kórsetti.  Ulttyq qor aktıvteri $61,1 mlrd, altyn-valıýta rezervteri $29,3 mlrd qurady.

«Búgingi tańda syrtqy ekonomıkalyq konıýnktýrada teris dınamıka baıqalyp otyr. Birqatar iri halyqaralyq qarjy uıymdary men damý ınstıtýttary bıyl álemdik ekonomıkanyń ósý boljamdarynyń tómendegenin habarlady. Energııa tasymaldaýshylarǵa baǵanyń tómendeýiniń áseri OPEK-tiń naryqty turaqtandyrý boıynsha úılestirilgen sharalardy iske asyrýǵa qatysty kelisimge kele almaýy aıasynda kúsheıe tústi», – dedi A. Mamın.

Premer-Mınıstr Memleket basshysy jedel áreket etý respýblıkalyq shtabyn qurǵanyn atap ótti. Tıisti shtabtar barlyq óńirlerde qurylǵan. Úkimet jaǵdaıdy odan ári damytýdyń birneshe nusqalaryn pysyqtady, olardyń árqaısysy qajetti resýrstarmen, onyń ishinde qarjylyq resýrstarmen qamtamasyz etilgen. Ulttyq ekonomıkaǵa teris syrtqy konıýnktýradan áserlerdi azaıtýǵa baǵyttalǵan birqatar sharalar ázirlendi.

«Atalǵan sharalardyń negizgi maqsaty – halyqtyń ál-aýqatynyń saqtalýyn qamtamasyz etý. Azamattarymyzdyń eshqaısysy qıyn jaǵdaıda qalmaıdy», – dedi A. Mamın.

Úkimet basshysy ákimdikterge áleýmettik mańyzy bar taýarlar boıynsha naryqtarda taýar ıntervensııalaryn ótkizý úshin turaqtandyrý qorlarynyń tıimdi jumysyn qamtamasyz etýdi tapsyrdy.

«Biz otandyq kásiporyndardyń taýarlary men qyzmetterine suranysty yntalandyrý boıynsha qolda bar barlyq ishki rezervterdi iske qosýymyz kerek», – dep Premer-Mınıstr, ımportty almastyrýdy kúsheıtý jónindegi naqty sharalarmen jospar ázirleýdi tapsyrdy.

Premer-Mınıstr «Samuryq-Qazyna» UÁQ» AQ-ǵa, ulttyq basqarýshy holdıngterge jáne Úkimetke esep beretin basqa da uıymdarǵa valıýta naryǵyndaǵy óz operasııalaryn Ulttyq Bankpen kelisýdi tapsyrdy.

Qarjy mınıstrligine memlekettik organdarmen birlesip, bir apta merzimde basym emes ınvestısııalyq jobalardy iske asyrý merzimin aýystyra otyryp, bıýdjettik shyǵystardyń basymdyqtaryn qaıta qaraý jóninde usynystar engizý tapsyryldy.

Úkimet basshysy Eńbek jáne halyqty áleýmettik qorǵaý mınıstrligine ýaqytyly áleýmettik tólemderdi tolyq kólemde qamtamasyz etýge jáne jumyspen qamtýdyń jańa Jol kartasyn ázirleýge tapsyrma berdi, onyń aıasynda ınfraqurylymdyq jobalardy iske asyrý, áleýmettik nysandardy jóndeý jáne eldi mekenderdi abattandyrý jónindegi jumysty kúsheıtý, sondaı-aq ákimdiktermen birlesip azamattardyń eńbek quqyqtarynyń saqtalýyna qatań baqylaýdy qamtamasyz etý tapsyryldy.

«Bizdiń ortaq mindetimiz – áleýmettik turaqtylyqty qamtamasyz etý jáne jumyspen qamtý. Áreket etip turǵan jumys oryndaryn saqtaýǵa jáne jańa jumys oryndaryn qurýǵa erekshe nazar aýdarý qajet. Memlekettiń barlyq áleýmettik mindettemeleri oryndalatynyn atap ótkim keledi. Barlyq zeınetaqy men járdemaqy ýaqytyly ári tolyq kólemde tólenedi»,  dep túıindedi  A. Mamın.

Ilmek sózder: Úkimet otyrysy

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir