Jumys barysy kóńilimizden shyǵyp otyr - EQYU keńsesiniń basshysy beıbit jıyndar týraly zań jobasy jaıly

«BUU – Áıelder» qurylymynyń jobalyq menedjeri Gúlnar Smaıylova halyq ishinde beıbit jıyn ótkizý mádenıetin kóterý boıynsha jumys júrgizý kerektigin atap ótti, dep habarlaıdy QazAqparat.

«Memleket úshin osynaý mańyzdy zańdy ázirlegenderińiz úshin rahmet. Osy zańdy qabyldaýmen birge halyqtyń tanym-túsinigin arttyrý boıynsha, ıaǵnı beıbit túrde jınalýdyń mádenı amal-ádisterin de úıretý kerek degen pikirdemin. Bálkim qoǵamdyq keńesterde, máslıhattardyń alańynda adamdardyń qalaı beıbit jınalatynyn, qalaısha sypaıy amal-ádister arqyly oı bildirýge bolatyny jaıly tyńdaý ótkizgen jón bolar», – dedi Gúlnar Smaıylova beıbit jıyndar týraly zań jobasynyń talqylaýynda.

Ol sonymen qatar jalpy jaǵdaıdy mıtıngke ulastyrýdyń qajeti joqtyǵyn aıtady.

«Beıbit jıyndarǵa jetkizbeı-aq qoǵamdyq keńester men máslıhattarǵa baryp, ıaǵnı mıtıngke jınalmaı-aq el pikirin tyńdaı alatyndaı jumys júrgizgen abzal. Qoǵamdyq qaýipsizdik pen halyq únine qulaq asatyn memleket dep aıtyp júrgenimizdeı, jıyndarǵa jetkizbeı-aq halyqty tyńdaı bilýge bolady», – dedi Gúlnar Smaıylova.

О́z kezeginde Eýropadaǵy qaýipsizdik jáne yntymaqtastyq uıymy baǵdarlamalary keńsesiniń basshysy Derd Sabo zań jobasyna oń baǵasyn berdi.

«Zań jobasy dál osylaı ázirlenýi kerek. Jumys barysy bizdiń kóńilimizden shyǵyp otyr. Ártúrli orynda, ártúrli deńgeıde pikirtalastar bolyp jatyr. Osynyń bári jańa ári baǵyty durys zańnyń dúnıege kelýine muryndyq bolar degen senimdemin», – dedi Derd Sabo elordada zań jobasy talqylanǵan jıynnan keıin tilshilerdiń suraǵyna jaýap bere otyryp.

Spıker Eýropadaǵy qaýipsizdik jáne yntymaqtastyq uıymy bul úrdiske úles qosýǵa daıyn ekenin bildirdi.

«Dál osy suraqtarmen aınalysatyn ınstıtýttarymyz, EQYU-nyń jeke bólimsheleri bar. Uıymǵa múshe memleketterdiń ótinishi boıynsha sarapshylyq pikir bildirip otyrady. Bizdiń uıym bul zań jobasyna taldaý júrgizýge daıyn», – dedi Derd Sabo.

Aıta ketsek, elordada búgin QR Aqparat jáne qoǵamdyq damý mınıstri Dáýren Abaevtyń tóraǵalyǵymen beıbit jıyndar týraly zań jobasyn jetildirý máselesi talqylandy. Is-sharaǵa QR Syrtqy ister vıse-mınıstri Erjan Ashyqbaev, Eýropadaǵy qaýipsizdik jáne yntymaqtastyq uıymy baǵdarlamalary keńsesiniń basshysy Derd Sabo, USAID-tiń Nur-Sultandaǵy Keńsesiniń dırektory Raıan Ýedl, Qazaqstan Respýblıkasyndaǵy BUU Adam quqyqtary jónindegi Joǵarǵy Komıssar basqarmasynyń ókili Leıla Dúısekova, sondaı-aq Germanııa, Ulybrıtanııa, Nıderlandy, AQSh-tyń Qazaqstandaǵy elshilikteriniń ókilderi qatysty.