Májilis depýtaty Bekbolat Tileýhan ekpe almaǵan balalardy balabaqshaǵa qabyldamaýdy zańmen bekitýge qarsy shyqty, dep habarlaıdy  Qamshy.kz aqparat agenttigi Sputnik Qazaqstan saıtynyń deregin negizge alyp. 

Búgin májiliste "Halyq densaýlyǵy jáne densaýlyq saqtaý júıesi týraly" kodeks jobasy birinshi oqylymda qaraldy. Atalǵan qujatta balalarǵa keıbir aýrýlarǵa qarsy ekpe saldyrý mindetti dep kórsetilgen. Ekpe salynbaǵan balalardy balabaqshadaǵy ujymdyq ımmýnıtettiń joǵary deńgeıi saqtalǵan jaǵdaıda ǵana alýǵa ruqsat beriledi. 

Májilis depýtaty Bekbolat Tileýhan qoǵamda daý týǵyzǵan bappen kelispeıtinin jasyrmady.

"Men saılaýshylarymnyń amanatyn jetkize otyryp, osy 89-bapqa qarsy shyǵatynymdy jetkizgim keledi. Jumsaq kúsh, ılandyra túsindirý ádisimen kóndirýdiń ornyna bas kóz joq "mindetti" dep zańǵa qondyryp, tizege salýdyń qandaı reti bar? Úkimet kúshine senbeı me, álde erine me?" dedi ol.

Depýtat jalpy vaksınaǵa qarsy emes ekenin, balalaryna saldyratynyn aıtty. Biraq munyń nege zańmen mindettelip otyrǵany Tileýhanǵa túsiniksiz.

"Bas prokýratýradan suraıtynym, bas tartqan adam is júzinde zań buzýshy bolyp shyǵa kele me? Konstıtýsııanyń 29-babyna qaıshy kelmeı me? Ár adam óziniń densaýlyǵyn qorǵaýǵa quqyǵy bar. Maǵan túsindirińizdershi, maǵan túsindire almasańyzdar, qoǵamǵa túsindirýge óte qıyn bolady. Nege biz mindetteýimiz kerek?" dedi májilismen.

Bas prokýrordyń orynbasary Marat Ahmetjanov munyń Ata zańǵa qaıshy emes ekenin málimdedi.

"Eger adamnyń ómirine, densaýlyǵyna qaýip bolsa, basqa zańmen onyń quqyǵyn, ıaǵnı, bilim alý, eńbek etý quqyǵyn shekteýge múmkindik bar. Sebebi, bizde adamnyń ómiri men densaýlyǵy eń qundy dep esepteledi. Sondyqtan, Konstıtýsııaǵa qaıshy emes" dep jaýap berdi ol.

Al densaýlyq saqtaý mınıstri Eljan Birtanovtyń aıtýynsha, mindetti vaksınasııany engizýdegi maqsat – ınfeksııalyq aýrýlardan basqa azamattardyń densaýlyǵyn qorǵaý.

"Sebebi qazirgi kúnde ata-analardyń ekpeden bas tartýynyń saldarynan elimizde burynnan umytylǵan ınfeksııalyq aýrýlar qaıtyp kelip jatyr. Biraq odan tek qana sol balalar emes, basqa da kóptegen medısınalyq aýrýmen aýyratyn balalar aýyryp ólýde. Biraz memlekette keıbir vaksınalardy salý zańmen mindettelgen. Bizdiń de kózdegenimiz osy" dedi ol.

Májilis depýtattary zań jobasyn birinshi oqylymda maquldady.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir