Turǵyndarmen kezdesken Toqaev Qordaıdaǵy janjalǵa kinálilerdi atady

Qazaqstan prezıdenti Qasym-Jomart Toqaev 1 naýryzda Jambyl oblysy Qordaı aýdanyna jumys saparymen baryp, aqpanda etnıkalyq qazaqtar men dúngender arasynda janjal bolǵan aýyldardyń biri – Qarakemer (kileń qazaqtar turatyn aýyl) aýylynyń turǵyndarymen kezdesti. Toqaevtyń sapary týraly Aqorda saıty jazdy. 

Aqordanyń jazýynsha, kezdesý barysynda prezıdent turǵyndar arasynda bolǵan janjal "memleketke nuqsan, el abyroıyna zııan keltirgenin" aıtyp, "keleshekte mundaı qasiretti boldyrmaý úshin tıisti shara qoldanýymyz qajet" dep atap ótti. 

Kezdesý kezinde Toqaev janjaldan soń Jambyl oblysynyń basshylyǵy ne sebepti aýystyrylǵanyn túsindirgen. 

"Qaqtyǵys bolǵan jerde eshqashan, eshqandaı damý bolmaıdy. Bul – zańdylyq. О́kinishke qaraı, oblys basshylary bul zańdylyqty durys túsingen joq. Sondyqtan oblys basshylary, sonyń ishinde quqyq qorǵaý organdarynyń basshylary tolyǵymen aýystyryldy, qyzmetkerler jumystan bosatyldy. Jańa basshylar taǵaıyndaldy. Solardyń arasynda Berdibek Saparbaev bar. Bul azamatty jaqsy tanısyzdar. Tájirıbesi mol memlekettik qyzmetshi. Onyń aldynda turǵan maqsat – turaqsyzdyqqa túrtki bolatyn jaǵdaılardy túbegeıli joıý jáne óńirdiń damýyna serpin berý" dedi ol turǵyndarmen kezdesýde.

"Aýdanda bir top adam belsendi túrde kontrabandamen aınalysyp júrgen. Bul – belgili nárse. Osy iske basqa top ta qatysqysy kelgen. Bir sózben aıtsaq, zańsyz tabys kózi úshin eki qylmystyq toptyń arasynda teketires paıda bolǵan. Bul teketires saldarynan kóp adam zardap shekti. 11 adam qaza tapty. Ony ashyq aıtý kerek. Endi quqyq qorǵaý organdarynyń aldynda turǵan maqsat – barlyq qylmyskerlerdi ultyna qaramaı, zańǵa sáıkes jazaǵa tartý. Onsyz elimizde tártip bolmaıdy"  dedi prezıdent.

Toqaev jıynda sóılegen sózinde "ashyq aıtý kerek" dep  aıtqanymen, 11 adamnyń ólimine sebep bolǵan "janjaldasqan eki kontrabandalyq topty" naqty atamady. 

Aqpannyń jetisinen segizine qaraǵan túni Jambyl oblysy Qordaı aýdanyndaǵy birneshe aýylda qazaqtar men dúngender janjal bolyp, resmı aqparat boıynsha, 11 adam qaza taýyp, 180-nen asa adam zardap shekken. Masanchı, Sortóbe, Bular batyr, Aýqatty aýyldarynda resmı málimet boıynsha, 20 saýda orny men 39 úı búlinip, 47 kólik órtengen.

Resmı málimet boıynsha, turǵyndar arasyndaǵy janjal etnıkalyq dúngenderdiń qazaq qarııa men onyń eki ulyn uryp-soǵýynan keıin bastalǵan.