Ázirbaıjanda koronavırýs juqtyrǵan Reseı azamaty anyqtaldy

Ázirbaıjanda koronavırýs juqtyrǵan Reseı azamaty tirkeldi. Bul týraly Ázerbaıjan mınıstrler kabıneti janyndaǵy jedel shtab aqparatyna silteme jasap Trend.az agenttigi habarlady.  

Agenttiktiń habarlaýynsha, vırýs juqtyrǵan Reseı azamaty Iran-Ázerbaıjan baǵytynda memlekettik shekarany kesip ótý kezinde odan koronavırýstyń alǵashqy belgileri anyqtalǵan, osyǵan baılanysty vırýs juqtyrǵan azamat aýrýhananyń arnaıy ınfeksııalyq bólimine jatqyzyldy. Júrgizilgen synamalar men testerdiń qorytyndysy onyń vırýsty juqtyrǵanyn kórsetti.

Agenttik qazirgi ýaqytta vırýs juqtyrǵan adamnyń jaǵdaıy turaqty ekenin habarlady. Ázirbaıjan bıligi vırýstyń taralýyn jáne onyń saldaryn boldyrmaý úshin tıisti sharalar qabyldap jatyr. Qajetti aqparatty alý úshin vırýs juqtyrǵan azamatpen baılanysqan adamdardy anyqtaý, onyń vırýsty qaıdan juqtyrǵanyn,  taralý joldaryn anyqtaý jumystary júrgizilip jatyr.

Sońǵy derekke sáıkes, álem boıynsha 80 myńnan astam adamǵa koronavırýs juqqan. Shamamen 2800 adam vırýstan kóz jumǵan. Olardyń basym bóligi - Qytaıdyń Hýbeı provınsııasynyń turǵyndary.