Aǵadildiń qorǵaýshysy: Marqumnyń qabirin ashýǵa týra keledi

Áleýmettik jelide 25 aqpanda Nur-Sultandaǵy tergeý abaqtysynda jumbaq jaǵdaıda qaıtys bolǵan qoǵam belsendisi Dýlat Aǵadildiń denesinde "azaptaý belgileri bar" degen vıdeo tarady.   Aǵadildiń advokaty Baýyrjan Azanov áleýmettik jelide tarap jatqan vıdeoǵa baılanysty óziniń facebook paraqshasynda málimdeme jasady.

Azanovtyń sózinshe, ol Aǵadildiń qazasyn estı sala Nur-Sultan qalasyndaǵy marqumnyń denesi jetkizilgen máıithanaǵa barǵan. Esik aýzynda turǵan kúzet ony basynda birazǵa deıin ishki kirgizbegen. Artynsha tergeýshi shyǵyp, ishke kirgizgen.

Advokat ishke kirgende Aǵadildiń denesi kesilip qoıǵanyn kórgen. Marqumnyń ishki organdaryn ǵana kórdim degen ol maman bolmaǵandyqtan ishki organdarǵa syrtqy áserdiń bolǵan, bolmaǵanyn bile almadym deıdi.

– Sondyqtan men tergeýshiden táýelsiz mamandar men sarapshylardy tappaıynsha máıitti soıýdy toqtata turýdy talap ettim. Kelesi kúni adam quqyǵy men zańdy qadaǵalaý jónindegi Qazaqstandaǵy Halyqaralyq bıýro taýyp bergen sarapshylar arnaıy komıssııa quramyna qosylyp, ashylyp qoıylǵan máıitti zertteýge qatysty.

Men syrttan baqylap turdym, kórgenderimdi qujat júzinde rásimdeýdi suradym. Máıitten alkogol ısiniń shyqqanyn sezbedim. Sol jerde Dýlattyń týǵan baýyry basynan aıaǵyna deıin boldy, –  deıdi ol.

Azanovtyń jazýynsha, eger foto men vıdeodaǵy dárigerler aıtqandaı qazadan keıin 2-3 kúnde paıda bolatyn máıitke tán daqtar emes, shynymen de jaraqat bolsa, ólimge soqtyrǵan azaptaýdyń dáleli bolsa, onda kisi ólimi deregi boıynsha qylmystyq is qozǵaýǵa, kinálilerdi jazalaýǵa aryz túsirýge bolady.

Biraq ol úshin keshe jer qoınyna tapsyrylǵan marqumnyń qabirin ashýǵa týra keledi. Oǵan marqumnyń jaqyndary kelisim berýi kerek. 

– Meni qabirdi ashýdy talap etetin jaǵdaıǵa tap qyldy, biraq bul tek týystarynyń ruqsaty boıynsha ǵana jasalady, – deıdi Azanov. 

Advokat áleýmettik jelide taraǵan vıdeodaǵydaı Aǵadildiń denesinde rasymen kógergen belgiler bolǵan bolsa, jaqyndary nege ony keshe jerleý aldynda ózine aıtpaǵanyna qapaly. Onyń sózinshe, foto men vıdeony jarııalaǵandar marqumnyń jaqyndarynan ruqsat suramaǵan.

– Eger maǵan máıittegi jaraqat izderi týraly aıtqanda men dereý jerleý rásimin toqtatyp, tergeýshilerden máıitke qosymsha zertteý júrgizýlerin talap eter edim. Biraq maǵan ol jóninde eshkim aıtpady. Jerleýden keıin foto men vıdeo shyǵyp otyr. Bul qısynǵa kelmeıdi. Bári shyndyqqa jetkisi keledi, onyń ishinde men de barmyn. Eger kisi ólimi qasaqana bolǵan bolsa, jerleýdi toqtatyp, tergeý sharalaryn jasap, kóńildegi kúdikti seıiltý kerek edi. Qabirdi ashyp, máıitten azaptaý belgilerin tapsaq, kisi óltirgenderdi tabý ońaı bolar edi,  –  deıdi Azanov.

Polısııa úıinen kúshtep áketken belsendi 43 jastaǵy Dýlat Aǵadildiń Nur-Sultannyń tergeý abaqtysynda qaıtys bolǵany týraly habar aqpannyń 25-i kúni tústen keıin belgili bolǵan. Nur-Sultan polısııa departamentiniń aldyn ala deregi boıynsha, belsendi Aǵadil "júrek talmasynan" kóz jumǵan. Belsendiler men Aǵadildiń tanystary onyń júregi aýyrmaǵanyn aıtady.

♦ Oqı otyryńyz: Dýlat Aǵadildiń anasy: Azanovqa esh renjimeımin, tek mazalamasa eken (vıdeo)