"Respublika" qozǵalysy "Dempartııamen" birigip mıtıngige shyǵatyn málimdedi

Respublika qozǵalysy facebook paraqshasynda Qazaqstannyń Demokratııalyq partııasymen birge 1 naýryzǵa josparlanǵan mıtıngke shyǵatynyn málimdedi.

"Ár azamat qoǵamǵa, adamdarǵa zııansyz, zańǵa, demokratııa prınsıpterine qaıshy kelmeıtin kez kelgen kózqarasty ustanýǵa, tańdaýǵa qaqyly. Sondyqtan, Dýlat Aǵadildiń qazasy – jeke adamnyń nemese qozǵalystyń emes, Qazaqstannyń adam quqyǵyn basty qundylyq sanaıtyn barsha azamatynyń ortaq qaıǵysy dep esepteımiz.

Talabymyz:

1. Dýlat Aǵadildiń ólimine kináliler zań boıynsha jazasyn alýy kerek. Onyń ólimi – ony tutqyndaý men qaýipsizdigin qamtamasyz ete almaýynyń saldary dep esepteımiz;

2. Qazir túrmede otyrǵan barlyq saıası tutqyndardy bosatý.

3. Qazaqstanda saıası kózqarastary úshin qýdalaýdy, qysym kórsetýdi toqtatý;

4. Osyndaı zań buzýlarǵa qarsy jaýapkershilikti kúsheıtý, ádil, táýelsiz sot júıesin qurý.

5. Halyqpen dıalog jasandy, kózboıaý keńesterde júrýi múmkin emes. Estıtin úkimet qyrtqan sóz bolmaı, is júzinde dáleldensin. Halyqtyń shyn daýsyn estigisi kelse, erkin, beıtarap alańǵa kelsin.

Qazir saıası ustanym, kózqarastardyń aıyrmasyna qarap bólinetin ýaqyt emes. Biz talap etetin ózgerister men qol jetkizgimiz keletin maqsat ortaq. О́mir súrý, tańdaý, saıası jáne basqa da erkindigimizdi qorǵaýǵa daıynbyz. Qazirgi bılik bul quqyqtarymyzdy qamtamasyz etýge qabiletsiz, tipti múddeli emes ekenin tolyq dáleldep bitti. Qazir únsiz qalsaq, kelesi qurban kez kelgenimiz bolatynymyzdy jáne ol úshin eshkim jaýap bermeıtinin árqaısymyz uǵatyn kez jetti.

Erkindik qylmys emes!