• USD 389.52
  • EUR 429.21
  • RUB 6.07
  • CNY 54.94
07 Sáýir, 06:21:40
Shyńjańdyq dúngen: Dereý qazaqtardan keshirim surańdar! (aýdıo)

27 Aqpan, 2020 NEWS

"Ańyraǵan artyńdaǵy asyqtaı, Alty balań Alty Alashqa amanat!" Dýlat Aǵadilge arnalyp jazylǵan óleńder

Foto Dýlat Aǵadildiń facebook paraqshasynan alyndy

Qoǵam belsendisi Dýlat Aǵadildiń qazasy qoǵamda úlken tolqynys týdyrdy. Qaraly qaza qaıǵysyn óleń joldary arqyly jetkizip jatqandar da az emes. Solardyń birqatary tómende usynylǵan.

О́ldi Azamat!
О́ldi qazaq!
О́ldi arys!
О́r namyspen almastyrdy sherdi arys.
Mángúrttikti ajalymen kómdi arys,
Jendetterdi ólimimen jeńdi arys.

Tamdy Alashtyń janarynan qandy jas,
Kek bop, órt bop ult janynan tamdy jas.
Tura almaıdy endi bılik basynda
О́zge ulttan kirgen óńkeı qańǵybas.

Arys óldi ar, namysty oıatyp,
Kek, qaıratty qanymen boıatyp.
Anaý tórdiń tóbesinen túıreıdi
Ár qazaqtyń keýdesinen jaı atyp.

Er qazasy − jańa ómirdiń aq tańy,
Erkin eldiń basqa “nurdy” jaqqany.
El qulpyrar ezgisinen qutylyp,
Quldyraıdy qurdymynan taqtaǵy.

Sopy Smataev

 

Arysym-aı, arysym!

Sherlimin men, sherim eshbir tarqamas,

Arysym-aı, zarlap jatyr alty alash.

Bar qazaqtyń jyrtyp edi namysyn,

Mundaı júkti Aplaton da tarta almas...

 

Arysym-aı, arasha izdep aryńmen,

Sharq urdyń ǵoı shartarapqa zaryńmen.

Oqshaý ediń ar jolynda muqalmas,

Oqshaý ediń boıyńdaǵy darynmen.

 

Arysym-aı, jyǵylǵandaı báıterek,

Bolmaǵanda sendeı batyr qaıter ek.

Aramyzda júrseń áli baýyrym,

Oǵlan dep orda buzǵan aıtar ek.

 

Qaıǵy-muńǵa endi sherli batam da,

Aırylǵanda senen endi jatam ba.

Oılandyryp kettiń qara halqyńdy,

Dabysyń ǵoı ketti alys jahanǵa.

 

...Bıshigeshke arystandaı atyldyń,

Bir óziń sen myń erime tatydyń.

Barsha jurtyń máńgi umytpas, baqul bol,

Bir ǵasyrda bir týatyn batyrym!

Baqytjan Tobaıaq-tegi

 

AQ-ÁDIL

NUR-SULTANDA
Búgin bolǵan bir ólim.
Shaılyqtyrdy OTANYMNYŃ JÚREGIN.
Sen qalasań ıyǵymda, mine bas!
Muńlyq OTAN,
Saǵan ǵana qul edim.

Ol-Aqádil.
Aıtqany da aq, ádil.
Arpalystyń ataýy ma jańa bul?!
Elemedik jan aıǵaıdy keshe biz.
Seni keshe tanymadyq "Jaman ul"!

Sen-aq aıttyń sol shyndyqty jaı ǵana.
Bári kýá - kórshi-kólem, aınala.
Sol úshin-aq bas jarylyp, qol synyp,
Sol úshin-aq kisi óle me qaımana?!

Shymbaıyna batqan sátte shynshyl syn,
Shyńdy balta qıyp túsken qyrshynsyń.
Tońy qalyń topyraǵy Arqanyń.
Topyraǵynan men de saldym bir shymshym.

Erlik, rýh, bári búgin ózińsiń!
Shydaı-shydaı shyrt úzilgen tózimsiń.
Aq tánińe aýyr topyraq bastyrdyq,
Sen tynyshtal!
Halqyń taǵy kóz ilsin!

NUR-SULTANDA.
Búgin bolǵan bir ólim
Shaılyqtyrdy Otanymnyń júregin!

Almas Ahmetbekuly

 

Qurbandyq

(Dýlat Aǵadil baýyryma)

Batyr óldi,
Anyǵynda óltirdi..,
Jurttyń janyn yza, kekke toltyrdy.
Sharasyzdan judyryq bop túıilip,
Jeń ishinde jasyrýly qol turdy.

Jigit óldi,
Namysynda eldiktiń,
Týyn baılap tuǵyryna erliktiń.
Erkektershe dáleldedi deńgeıin
Butyndaǵy shalbar menen beldiktiń.

Shyndyq óldi,
Sharanadaı shyńǵyryp,
Qalyń eldi mazalaýda myń kúdik.
Shyǵyp ketti jalǵandyqqa shydamaı,
Satqyndyqtyń terezesin syndyryp.

Namys óldi,
Ulttyń uly jolynda,
О́zegi tar óz zańynyń qolynda.
Sen erkinsiń,
Esesine, beıshara –
"Toty qustar" taranady torynda.

Múmkin emes tutanǵan ot janbaýy,
Múmkin emes uıqynyń da qanbaýy.
Qazaq úshin qurbandyq qyp shalýǵa
Bul ǵasyrdyń saǵan tústi tańdaýy.

Aqıqatyn aıtar bolsam shamalap,
Bárine de ýaqyt qaldy shamaly-aq.
Ańyraǵan artyńdaǵy asyqtaı
Alty balań Alty Alashqa amanat!

Álibek Shegebaı

 

Sen ólesiń el úshin bolyp qurban,
Selt etpeıdi biri de kórip turǵan.
Kúni boıy memleket ósek soqty
Tiri adamyn otyz jyl ólik qylǵan!

Sen ólesiń...ólmeıdi ótirik tek!
Kekirip bop sóıleıdi kekilik kóp.
Jyrq-jyrq etip jelide jurtym otyr
Osyndaıda jylaıtyn ókirip kep.

Sen ólesiń qor bolyp qorqaýlarǵa,
Kór qazady arlanǵa kórǵaý qarǵa!
Qannen ǵana qapersiz qazaq osy -
Jan salmaıtyn aldyna sor tańdaýda.

Dáýren Berikqajyuly

 

Jyr jylaıdy...
(Eki óleń)

Zamandy qaıtem, adamdy qaıtem birtúrli,
Julmalap júrgen jerimdi, tilim, ǵurpymdy?!
Táýekel etip túıilgen judyryǵyńdaı
Jumyldyra almaı kettiń-aý, Dýlat, jurtyńdy...

Otyny kúl bop, Otany jatsa zar jylap,
Bireýler úshin bıligi - baqyt, qarjy - baq.
Qaharym qaıda, qanymyz qatyp qalǵan ba?
Batyrlyq qaıda, qalǵan ba ol da qaljyrap?

Rýhy jasyp, saǵy da synyp, syr qańǵyp,
Otyz jetiniń elesi eldi júr me ańdyp?
Omalyp bir kún qalar ma ekenbiz, oıpyr-aı,
Otyra bersek oǵyz uldardy qurban qyp...

 Aıgúl Jumadil

 

Dýlat Aǵadil ólimine

Bárińniń de shendilerge ókpeń kóp,
Daýryqpańdar!
Ony eshkim tepken joq,
Topqa salyp, tarpymady kóp jendet.
Ǵazireıil tóngen kezde kókten kep...
...Ol óziniń ajalymen ketken joq...

Aqpan kúni taýysqanda jaryǵyn,
Úsheý kirip, esin alyp báriniń,
Alǵa salyp Alashynyń nar ulyn,
Alyp ketti... aıtpaı sóziń anyǵyn,
Túspedi eńse, qýshımady jaýyryn.

"Belsendim-aı, shylbyryńdy bosqa úzdiń,
Joǵyn joqtap neǵylasyń bes qyzdyń?
Júretindeı quryq kórmeı, bos tizgin,
Tusaýyńdy kimge sonsha keskizdiń?" -
dedi me, álde demedi me úsh quzǵyn?..

Kórinbesin soqqy bergen "syı" betten,
Jendetterdi basqa ádiske úıretken:
Sorly bolsyn qur súlderin súıretken,
Ishten uryp, tebý kerek búırekten...
Osy tásil talaı erdi "bıletken".

Ol ashynǵan, jany aýyrǵan ul edi,
Aınalasy quldyq urǵan qul edi...
Abaqtyǵa barǵany sol kún edi...
Aıaq asty "ustap qaldy" júregi.
Bárin Alla, bárin Alla biledi...

Bul pendeniń tirshilikte isi kóp,
Dıirmendi aınaldyrar kúshi kóp.
Tańdanbaıyq, oqıǵa ǵoı "kishirek":
Bizdiń eldiń batyrlary - "kisinep",
О́zin-ózi atady ǵoı úsh ret.

Talaı erdi tizerletken dala bul,
Talaı ezdi qoqyraıtqan qala bul.
Ańyraǵan alty bala, ana bul...
Arǵy jaqta soǵan qorǵan bola júr -
Qashan qoǵam ornar eken aq, ádil...
Baqul bolǵyn, Dýlat baýyr Aǵadil...

Eseı Jeńisuly

 

Aqyrzaman taıaǵanda....
Qazaqtyń jaýy qazaq bolady,
Azattyǵyń azap bolady.
Daýasyz dertiń bolady,
Formasyz mentiń bolady,
Aýladan aýlaǵany -
Shal menen kempir bolady.
Kóliń qurǵaq bolady,
О́nim - qymbat,
О́lim - jumbaq bolady.
Kóktegi "juldyzdar" jerge túsip,
Halyqqa oıyn oınatady,
Jerdegi úı aspanǵa ushyp,
Ushaqtyń soryn qaınatady.
Sıyrǵa jetpeıtin pulyń bolady,
Úshke bólingen tiliń,
Jetpis úshke bólingen diniń bolady.
Qalalar "adam" bolady,
"Danalar" nadan bolady.
Atqaminerler Alladan qoryqpasa,
Aqyry jaman bolady!

Erkebulan Qaınazar 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir