"Ekrandaǵy tóbeles ómirdegi tóbeleske ulasyp ketýi múmkin": 11 mlrd bólingen kınonyń konservasııada turý sebebi aıtyldy

Mınıstrlikten 11 mlrd teńge bólingen "Qasym han" týraly kórkem fılmniń túsirý jumystary toqtap tur. Buny bastapqy ssenarıı avtory Smaǵul Elýbaı rastady, dep habarlaıdy Qamshy.kz aqparat agenttigi Azattyq Rýhy deregin negizge alyp.

Onda jazýshy áýeli atalǵan fılm taǵdyrynyń qalaı sheshilgenin aıtyp bergen: 

«Fılm toqtatyldy, konservasııada tur. Qarjylyq máseleleri tekserilip jatyr. Ary qaraı ne bolatynyn bilmeımin. Osy daýdan soń mınıstrmen kezdesý boldy. Biraq ol odan da joǵary deńgeıde sheshildi ǵoı. Ol úlken kisilerge aıtyp kóreıin dedi. Aıtyldy. Sosyn toqtatyldy. Fılm halyqqa kerek. Men bir jyldaı jumys istegen ssenarıı tur, daıyn. Biraq joba múldem jabylǵan joq. Ýaqytsha toqtatylyp tur. Meniń oıymsha, bári durys sheshiledi. Sebebi qarjysy bólingen, jabylmaýy kerek dep oılaımyn. Konservasııadan alynýyn kútip otyrmyz», - deıdi Smaǵul Elýbaı.

Qalamger budan bólek Mınıstrlik ókilderi bul máselege qatysty aldaǵy kúnderi jaýap beretinin de jetkizedi. Sonymen birge, tájirıbeli túrik rejısseriniń kópserııaly kıno túsirýine nege qarsy bolǵanyn ashyp túsindiredi.

«Gıýnaı joba toqtatylǵan soń ketip qaldy. Men onymen bir-aq ret, eń alǵash kelgen kezde kezdesip, talqylaýda  birge bolǵanbyz. Biraq keıin biz onyń kóp serııa túsirýine qarsy boldyq qoı. Onyń sebebi 30-40 jyl Qasym han men Muhamed Shaıbanı qazaq-ózbek bolyp soǵysady. Men jazǵan ssenarııde bul jaǵy jasyryn kórsetilgen edi. Endi álgi serıalda ony jasyra almaıtyny belgili. Ekrandaǵy tóbeles ómirdegi tóbeleske ulasyp ketýi múmkin. Toqatý kerek dep qarsy bolǵanym sondyqtan. Aralasyp otyrǵan dos halyqpen soǵysty nasıhattaýǵa bolmaıdy. Eger bir serııasyn túsirsek, bir-aq ret soǵys kórsetiledi. Negizgi aksent Muhamed Shaıbanıdiń ózi men Qasym hanǵa jasalady. Qalǵan jerinde sylap-sıpap ótip ketemiz. Onyń aqyrynda ózbekter jeńilip ketti, Syǵanaqty tastap, olar Buqara, Samarqanǵa aýyp ketti», - deıdi jazýshy.

Eń qyzyǵy, Smaǵul Elýbaı bir serııaly prokatqa arnalǵan «Qasym han» týyndysyna Mınıstrlik bólgen qarjydan az aqsha ketedi dep esepteıdi. Onyń aıtýynsha, ózi usynǵan jobaǵa 2 mln AQSh dollary kóleminde qarajat jetkilikti. 

Eske sala keteıik, Smaǵul  Elýbaı «Batyr Baıan» (1992), «Kek» (2004), «Ańshy bala» (2012), «Almas qylysh» (2016), «Qazaq handyǵy» teleserıaly (2016), «Altyn taq» (2019) sııaqty birneshe týyndy ssenarııleriniń avtory.