Prokýratýra: "Dýlat Aǵadildiń denesinde zorlyq-zombylyq belgileri anyqtalǵan joq"

Nur-Sultan qalasynyń ýaqytsha ustaý ızolıatorynda kóz jumǵan Dýlat Aǵadildiń denesinde zorlyq-zombylyq belgileri anyqtalǵan joq. Bul týraly búgin qalalyq prokýratýradan málim etti, dep habarlaıdy Qamshy.kz aqparat agenttigi QazAqparat deregine súıenip.

«25 aqpan kúni Nur-Sultan qalasynyń Polısııa departamenti Aǵadildiń kóz jumý jaǵdaıy boıynsha sotqa deıingi tergeý amaldaryn bastady. Dál sol kúni barlyq mán-jaıdy zertteýdiń shynaıylyǵyn qamtamasyz etý maqsatynda qylmystyq is Nur-Sultan qalalyq prokýratýrasynyń arnaıy prokýrorlarynyń óndirisine qabyldandy», - dep habarlady elorda prokýratýrasy.

Belgili bolǵandaı, D.Aǵadildiń otbasynyń advokaty bergen ótinish boıynsha 26 aqpan kúni otbasy shaqyrǵan jeke sot sarapshylarynyń  qatysýymen marqumnyń denesine zertteý júrgizilgen.

«Onyń nátıjesi boıynsha, jumyldyrylǵan mamandar Aǵadildiń ólimine ótkir júrek-qan tamyr jetkiliksizdigi sebep bolǵanyn anyqtady. Denesinde zorlyq-zombylyqtan bolatyn qandaı da bir jaraqattar anyqtalmady. Iske tartylǵan sarapshylar, sonymen qatar onyń baýyry men advokaty tarapynan eskertý nemese ótinish berilgen joq. Sot saraptamasynyń qorytyndysy laboratorııalyq zertteý nátıjesi boıynsha beriledi. Sotqa deıingi tergeý amaldary jalǵasýda», - delingen vedomstvo habarlamasynda.