Tergeý departamentiniń basshysy Sanjar Ádilovtiń aıtýynsha, búginnen bastap osy isti arnaıy prokýrorlar tergeıtin boldy.

– Qazirgi kezde qylmystyq is arnaıy prokýrorlar basqarmasynyń óndirisinde. Olar bas prokýratýraǵa qaraıdy, – dedi Ádilov jýrnalısterge bergen suhbatynda.

Onyń sózine qaraǵanda, Aǵadildiń týystary sot-medısınalyq saraptamaǵa taǵy eki maman qatyssyn degen ótinish jasaǵan. Olarǵa ruqsat berildi. Al sot-medısınalyq saraptamanyń tolyq qorytyndysy zań boıynsha 25-30 kúnde jasalady. Departament basshysy qoǵam belsendisi qalaı ustalǵanyn da aıtyp berdi.

– Shuǵyl izdestirý sharalaryn Aqmola oblystyq departamenti qyzmetkerleri atqardy. Dýlat Aǵadil saǵat 20:37-de ustalǵan bolatyn. Odan keıin bizdiń qyzmetkerlerimiz ony emhanaǵa apardy. Sol jerde ol dene jaraqatynyń bar-joǵyn anyqtaıtyn tekseristen ótti. Sosyn narkologııa ortalyǵyna bardy. Mamandar Aǵadildiń ortasha deńgeıde mas bolǵanyn anyqtady. Aǵadildiń ózi eshqandaı qarsylyq kórsetken joq, – dep atap kórsetti Ádilov.

Dýlat Aǵadilmen birge tergeý ızolıatorynda otyrǵan tórt adamnan jaýap alyndy. Ádilovtiń aıtýynsha, olar jalpyǵa ortaq qylmystar úshin qamaýǵa alynǵan bolatyn. Alaıda departament basshysy naqty qandaı qylmys ekenin aıtqan joq.

– Olardan jaýap alyndy. Sol málimetter de Dýlat Aǵadilge qatysty eshqandaı zorlyq-zombylyqtyń jasalmaǵanyn rastap otyr, – deıdi Ádilov.

♦ Aǵadildiń advokaty: Maǵan onyń mastyǵyn rastaıtyn qujatty kórsetken joq

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir