"Myna tósekterdi Ǵalymjan ekeýiń óz úılerińe alyp ketińder": Amandyq Batalov taǵy da orynbasaryna shúılikti

Qurylystyń túsine deıin óz "fıltrinen" ótkizetin Batalov áýeli nysannyń syrt kelbetiniń qońyr-sarǵysh reńdi bolýy kerektiginen bastady syn-eskertpeni. Sosyn bir aralyqta: "Akvapark abattandyrý kezinde jataqhana terrıtorııasyna kire me? Josparda bar ma?", – dep surady.

Eń soraqysy, oblys ákimi qoıǵan saýalǵa qurylysqa jaýapty qos birdeı shendi – oblys ákiminiń orynbasary Lazzat Turlashov pen Taldyqorǵan qalasy ákiminiń orynbasary Saılaýǵaly Baınazarov ta kibirtiktep jaýap bere alǵan joq.

О́zderi salyp otyrǵan qurylystyń qýysy turypty, qujatyn tolyq bilmeıtin sheneýnikterge aımaq basshysy shart ketti sosyn:

– Men saǵan jobaǵa kire me, joq pa dep surap turmyn. Iá, joq dep adamdy nege shatastyryp tursyńdar? Eshqaısylaryń da jaǵdaıdyń parqyn bilmeısińder. Saraptamaǵa ótkizgen jobalyq-smetalyq qujattarda bul shekara bar ma dep surap turmyn. Mardymdy jaýap bere almaı, únsiz turasyń. Istiń mán-jaıyn bil. Sen barlyǵyn bilýiń kereksiń ǵoı. Osynda turǵan barlyǵyń jataqhana qurylysymen aınalysyp júrsińder. Jınalysta osy týraly saǵan jáne qala ákimine 10 ret aıttym. Kúndelikti tekserip, baqylap júrińder, – dedi ol.

Árıne, oblys basshysy bundaı sózdi qurylys salasyna jaýapty orynbasary Lázzat Mahatulyna qaratyp aıtty. Al ańdaýsyz syn ótinde qalǵan orynbasary bolsa, óziniń eki aptadaı jumysta bolmaǵanyn aıtyp aqtaldy.

Budan soń oblys ákimi stýdentterge arnalǵan bólmelerdi aralady. Arbıǵan eki qabatty temir tósekterdi kórgen ol taǵy da "mort" ketti: 

– Mynaý ne sumdyq? Myna tósekterdi Ǵalymjan ekeýiń óz úılerińe alyp ketińder. Men qaramasam, ómir boıy osylaı jumys isteısińder me? Kelesi kelgende mundaı temir tósekterdi kórmeıtin bolaıyn. Barlyǵyna birdeı bir kisilik aǵash tósek qoıyńdar. Syımaıdy emes, 3 tósek syıdyrýǵa bolady ǵoı. Erteń osylaı ótkize salsaq, balalar aǵash tósekke kim, temirine kim jatady dep talasyp qalǵany kerek pe? Oılanbaısyńdar ma?, – dedi A. Batalov.

Osylaısha tósenishten tóbedegi oıý-órnekke deıin tekserip, esh jumysqa kóńili tolmaǵan oblys ákimi:

– Túk te unamady. Tolyp jatqan beı-bereket sharýa. Mynandaı ǵımarat turǵyzyp turyp, osylaı jumys jasaý degen... О́z qolymmen syzyp, kórsetip bergen dúnıelerdi ǵana durys jasaǵan. Mynandaı nysandy qalaı turǵyzýǵa bolady? Jandaryń ashymaıdy. Barlyq kemshilikti túzetip, tez aýystyryńdar, – dep, apta saıyn ózi tekseretinin jetkizdi.

Atap óteıik, bıyl ashylatyn 96 bólmeli jataqhana stýdentterdiń alańsyz bilim alýy úshin qolǵa alynǵan. Joba quny – 2289,947 mln.teńge.

Ári qaraı oqyńyz: "Meniń kim ekenimdi bári biledi": Batalov óz abyroıyn túsirgisi keletinderge sálem aıtty