Túrkistan óńiriniń zııalylarymen kezdesýde Baýyrjan Baıbek ne aıtty?

Elimizdiń ońtústik óńirine jasaǵan saparynyń ekinshi kúninde Túrkistan oblysynyń birqatar shalǵaı eldimekenderin aralap, áıgili Otyrarǵa at basyn tiregen «Nur Otan» partııasy Tóraǵasynyń Birinshi orynbasary Baýyrjan Baıbek Túrkistan oblysynyń ákimi О́mirzaq Shókeevpen birge Otyrar arheologııalyq qoryq mýzeıinde óńirdiń el aǵalarymen jáne zııaly tulǵalarymen kezdesti.

Bas qosý barysynda óńirdiń jaı-kúıi, mádenıet, rýhanııat, bilim, týrızm salalary, óner men tildiń ahýaly áńgime arqaýyna aınalyp, keleli keńeske ulasty. Partııa tóraǵasynyń Birinshi orynbasary jınalǵandarǵa osy saparynyń maqsatyna toqtalyp, saıası uıymnyń qolǵa alǵan isteri men aldaǵy josparlary jaıynda keńinen áńgimeledi.

«Elbasynyń sheshimimen Túrkistan – túrki áleminiń rýhanı astanasy bolyp atandy. Kúzde munda úlken is-shara ótip, oǵan túrki elderiniń basshylary keledi. Mundaı jıyndar óńirge týrıster tartýǵa da oń yqpalyn tıgizedi. Durys uıymdastyrsa, týrızm salasynda kóp jumys oryndaryn ashýǵa bolady. Munda týrızm jaqsy damyp keledi. Arystan-Babqa kelip jatqan halyqtyń sany jyl saıyn ósýde. Osyny durys paıdalana bilý kerek.

Jalpy, rýhanııatsyz el bolmaıdy. Mádenıet, dástúr, til, óner sekildi rýhanı qundylyqtar – partııamyzdyń da basty basymdyqtary. Saıası uıymymyz asyl ónerimiz – aıtysty, jyr-termelerdi, ulttyq sportty qoldap keledi. Elbasy bastamasymen qolǵa alynǵan «Rýhanı jańǵyrý» baǵdarlamasy da osyǵan baǵyttalǵan. Rýhanı jańǵyrý degenimiz – ulttyq kodymyzdy saqtap, mádenıetimizdi, dástúrimizdi nasıhattap, basqa ozyq elderdiń jaqsy jaqtaryn ıgerý arqyly ózgerý. Osyǵan oraı bıyl Ál-Farabıdiń 1150 jyldyǵyn, uly Abaıdyń 175 jyldyǵyn atap ótkeli jatyrmyz. Osynaý Otyrar – danyshpan babamyz Ál-Farabıdiń kindik qany tamǵan jeri. Keıde áleýmettik jelilerde qarajat bólip, nege mereıtoılardy toılaı beremiz degen pikirler ushyrasyp qalady.Uly babalarymyzdy qadirlep, murasyn urpaqqa tanystyrmasaq, qalaı el bolamyz. Kemeńger Abaı kózdegen muratqa umtylý, siltegen jolyn ustaný, synaǵan kemshilikterden arylý – barshamyzǵa ortaq paryz», – dedi Baýyrjan Baıbek.

Emen-jarqyn suhbat barysynda zııalylar da óz usynys-tilekteri men oılaryn búkpesiz ortaǵa saldy. Belgili jazýshy Marhabat Baıǵut partııa aıtyspen qatar kórkem ádebıetke de kóbirek kóńil bólip, osy kezge deıin iske asyryla bastaǵan «Bir el – bir kitap» degen aksııany partııalyq baqylaýǵa alyp, ony qaıta jandandyrý arqyly aıasyn keńeıtýdi usyndy. Sonymen birge jańadan oblys ortalyǵy bolyp otyrǵan qasıetti Túrkistandy, adamzattyń altyn besigi bolǵan Qazyǵurtty ártúrli ádebı-mádenı sharalar arqyly nasıhattaý, «Túrkistannyń taı qazany – túrkilerdiń oı qazany» degen taqyryppen sana sapasyn arttyratyn jaqsy kitaptarǵa, jaqsy dramalyq shyǵarmalarǵa, basqa da mádenı-rýhanı dúnıelerge baıqaýlar uıymdastyrsa degen tilegin de jetkizdi. Al osy óńirdiń túlegi, áıgili aıtysker aqyn Áselhan Qalybekova «Nur Otan» partııasynyń aıtysqa bet buryp, qoldap jatqanyna rızashylyǵyn bildirip, ony óristete berý qajettigin aıtty.

Sondaı-aq, kezdesýde óńirdegi mektepterdiń jetispeýshiligi, jasóspirimder arasyndaǵy qylmys, sýısıd sekildi jurtshylyqty tolǵandyrǵan túıtkildi jaıttar da sóz bolyp, olardyń aldyn alý sharalary talqylandy. «Nur Otan» partııasynyń doktrınasynda da jastar men urpaq tárbıesine erekshe mańyz berilgen.