Shymkenttik sarbazdyń qarý-jaraqty jalǵyz ózi qalaı urlaǵany belgili boldy

QR IIM Tergeý basqarmasynyń bastyǵy Sanjar Ádilov Túrkistan oblysynda qarý urlaǵan dezertır sarbaz oqıǵasynyń egjeı-tegjeıin aıtyp berdi, dep habarlaıdy Qamshy.kz aqparat agenttigi zakon.kz saıtynyń deregin negizge alyp. 

"Shynynda da bul arada belgili bir ýaqyt boıyna urlyq faktileri oryn alǵan. Qańtardyń sońynan bastap aqpan aıynyń ortasyna deıin qarý saqtaý qoımasyna ózdiginen kirýge ruqsat alǵan sarbaz bildirmeı kúnine bir-eki myltyqtan urlap ketip júrgen, - dedi Ádilov úkimet dálizinde jýrnalıster saýalyna jaýap bere.

Ádilovtyń aıtýynsha sarbaz jalǵyz bolmaǵan.

"Avtomattardyń jaıyna keler bolsaq, bul kezde áskerı sarbaz syrttaǵy óz tanystaryn kómekke shaqyrǵan. Negizgi qarý-jaraq túrleri bir kúnde, ıaǵnı 19 aqpannan 20-na qaraǵan túni urlanǵan. Ol eki tapanshany satyp úlgergen, biz ony birden taýyp, 120 myń teńgege satyp aldyq. Qalǵan qarý onyń dostarynda saqtalǵan, - dedi Ádilov.

Ol tergeý barysynda 291-bap, "Qarý urlaý" jáne 453-bap, "Qyzmet babyndaǵy salǵyrttyq" boıynsha qylmystyq ister qozǵalǵanyn aıtty.

"Tergeý málimetteri boıynsha, kelisimshartpen áskerı qyzmet atqarǵan serjant 1995 jáne 1996 jylǵy eki dosymen 29 avtomat, 28 tapansha jáne 2 pyshaqty myltyq urlaǵan.

QR UQK men IIM birlesken jedel-tergeý toby izin sýytpaı urlyqqa qatysy barlardyń barlyǵyn ustap, qarýlardy tárkiledi. Qazirgi ýaqytta Qorǵanys mınıstrligi Túrkistan oblysynda ornalasqan áskerı bólimde qarý-jaraqtardy qosymsha túgendeý jumystaryn júrgizip jatyr. Sonymen qatar, úsh laýazymdy tulǵa, atap aıtqanda dıvızııa komandıri, kezekshi arnaıy  ýákil, sondaı-aq kelisimshart boıynsha qyzmet etken qatardaǵy sarbaz áskerı qyzmet erejelerin buzǵany úshin, qarýdyń urlanýyna ákelip soqqan nemquraılylyqtary úshin qazirgi ýaqytta ustalyp, qamaýǵa alyndy, - deıdi Sanjar Ádilov.