Zaısandaǵy narazylyq: Jandarbek Bekshın Qytaı azamattary týraly aıtty

Qazaqstannyń bas sanıtarlyq dárigeri Jandarbek Bekshın Zaısandaǵy ahýalǵa baılanysty pikir bildirdi, dep habarlaıdy Qamshy.kz aqparat agenttigi QazAqparat deregine súıenip.

Jandarbek Bekshın áýeli óńirde koronavırýs juqtyrmaq túgili ondaı kúdikke ilingen eshbir adamnyń aýrýhanaǵa jetkizilmegenin málimdedi. Ári shekaradaǵy baqylaý qyzmetiniń de joǵary deńgeıde uıymdastyrylyp otyrǵanyn jetkizdi. 

«О́tken aptada men QHR-men shekarany aralap, avtokóliktik, temir jol ótkelderin qarap shyqtym. Ol jerde naqty baqylaý bar. Baqylaýdy kúsheıtip, biz sanıtarlyq 20 dárigerdi qosymsha qostyq. Sondyqtan táýlik boıy shekaramyz tekserýde. Bizde QHR-dan avtobýspen, temir jolmen, resmı túrde áýe jolymen qazir kelip jatqan jolaýshylar joq. Osyǵan qaramastan qaıtalap aıtqan elderdi naqty baqylaýǵa aldyq. Basqa elderde koronavırýs órship barady. Ol elderden kelýshilerdiń kelýine kedergi qoıyp jatyrmyz. Árbir ushaq baqylaýda», – dedi ol.

Osy rette, atalǵan óńirde jumys isteıtin qytaı azamattaryna da baılanysty suraq qoıyldy. О́z kezeginde bas sanıtarlyq dáriger keıin kelgen 4 adamnyń baryn rastaı otyryp:

«Ol azamattar ótken jyldan beri jumys istep keledi. Álbette olar óz lagerinde, ıaǵnı turǵylyqty jerde emes, qala syrtynda jumys isteıdi. Eger olar qaıtyp kelse, olar óz jaqtaryndaǵy lagerde 14 kúndik karantınnen ótedi. Keıin kelgen 4 adam bar. Olardyń karantınderi búgin aıaqtalady. Eshqandaı aryz-shaǵym joq», – dep qazir jaǵdaıdyń tolyq baqylaýda ekenin atap ótti. 

Eske sala keteıik, 19 aqpanda Shyǵys Qazaqstan oblysynyń Zaısan aýdanyna qarasty Saryterek jáne Aınabulaq aýylynyń turǵyndary aýyl ambýlatorııasynyń aldyna jınalyp, narazylyq bildirdi. Olar áleýmettik jelilerde taraǵan «Zaısan aýdanynda bir top adam koronavırýs juqtyrdy. Qytaımen shekarada ınfeksııa juqtyrǵan adamdardy aýyl ambýlatorııasynda emdeý úshin alyp keledi» degen aqparatty estip jınalǵan.