Baýyrjan Baıbek: Bılik pen halyq arasynda senim bolý kerek (vıdeo)

«Nur Otan» partııasy tóraǵasynyń birinshi orynbasary Baýyrjan Baıbek elimizdiń Ońtústik óńirlerine sapar shegip, aýyl turǵyndarymen kezdesý ótkizdi. Ol aldymen Shymkent qalasyna at basyn tirep, qaladaǵy birqatar problemalyq nysandardy aralady. Sondaı-aq búgin kezekten tys konferensııada qala ákimi Murat Áıtenov qalalyq fılıaldyń tóraǵasy bolyp saılandy. Bul týraly partııa tóraǵasynyń birinshi orynbasary feısbýk paraqshasynda habarlady. 

Ol jumys saparyn qala ákimimen birge Shymkenttiń Abaı aýdanyndaǵy M. Vodopıanov kóshesiniń ótken jyly úıleri órtengen turǵyndarymen kezdesýden bastady. Bul problemalyq nysan partııa tóraǵasy birinshi orynbasarynyń aldyńǵy saparynyń qorytyndysy boıynsha qyrkúıekte partııalyq baqylaýǵa alynǵan bolatyn. Qazirgi ýaqytta «Otaý stroı» qurylys kompanııasy turǵyn úıdiń irgetasyn qalap, ekinshi qabatyna qurylys-montaj jumystaryn júrgizýde.

«Elbasy aıtqandaı, «Nur Otan» – naqty isterdiń partııasy. Sondyqtan osy máseleni baqylaýda ustap, arnaıy kelip, ózderińizben kezdesip otyrmyz. О́zderińiz kórip otyrsyzdar, kompanııa bar, qarajat bólingen, qurylys júrip jatyr. Bul másele partııanyń baqylaýyna alynǵan. Bizben birge qala ákiminiń ózi kelip otyr. «Jumyla kótergen júk jeńil» degen. Bári zań sheńberinde sheshiledi», – dedi Baýyrjan Baıbek.

Jergilikti bıliktiń málimetine qaraǵanda, 5 qabatty turǵyn úıdiń qurylysyna jýyrda bıýdjetti naqtylaý kezinde qajetti qarajat bólinedi. Turǵyn úı jyl sońyna qaraı paıdalanýǵa beriledi.

Sodan soń Baýyrjan Baıbek qalaǵa budan bes jyl buryn qalaǵa qosylǵan «Tasken» yqsham aýdanyna bardy. Munda 2 myńdaı úı men birqatar áleýmettik nysan elektr energııasynyń aýyq-aýyq úzilip qalýynan qıyndyq kórip otyr. 

«Osy shaǵyn aýdanda tıisinshe jumystar júrip jatyr. 2000 úı degen ol úlken sharýa. Gaz sheshilýde, sý sheshilip jatyr. Qalǵan máseleler de retimen sheshiledi. Qyrkúıek aıyna deıin jergilikti monopolıst «Ońtústik Jaryq Tranzıt» 270 mıllıon teńgege 39 km jańa jeli tartýdy jáne 9 transformator ornatýdy josparlap otyr. Tarıfterdiń ashyqtyǵy men kommýnaldyq qyzmetterdiń sapasyn qamtamasyz etý maqsatynda «Nur Otan» bastamashylyq etken «Aıqyn tarıf» jobasynyń aıasynda biz bul máseleni partııalyq jáne qoǵamdyq baqylaýda ustaımyz, - dedi Baýyrjan Baıbek. 

Kezdesý kezinde turǵyndar basqa da túıitkelderdi, sonyń ishinde shaǵyn aýdandaǵy joldardyń sapasyna qatysty máselelerdi ortaǵa saldy. Jergilikti bıliktiń aıtýynsha, kóktemde osyndaǵy birneshe kósheni jóndeý jumystary bastalady.

Sonymen qatar «Nur Otan» partııasy tóraǵasynyń Birinshi orynbasary jumys sapary barysynda Shymkent qalasynyń belsendi turǵyndarymen, zııaly qaýymmen, jastarmen jáne úkimettik emes uıym ókilderimen birneshe kezdesý uıymdastyryp, qalanyń ózekti máselelerin birlese talqylady. Olardyń qatarynda qalanyń damýy, ınjenerlik jáne jol ınfraqurylymy, densaýlyq saqtaý, mádenı-áleýmettik jaǵdaıy, ıdeologııa salasy, rýhanııat jaıy bar. Baýyrjan Baıbek jurtshylyq kóterip otyrǵan máselelerdiń barlyǵy ázirlenip jatqan qalany damytýdyń 5 jyldyq baǵdarlamasyna enetinin atap ótti.