Úsh táýlikke qamalǵan Janbolat Mamaı eki táýlikten keıin bosap shyqty

21 aqpan kúni keshke "mıtıngige shaqyrdy" degen aıyppen úsh táýlikke qamalǵan Demokratııalyq partııa bastamashyl tobynyń jetekshisi, oppozısııalyq saıasatker Janbolat Mamaı eki táýlikten keıin bosap shyqty. Bul týraly Mamaıdyń ózi Facebook paraqshasynda habarlady. 

Mamaıdyń jazýynsha, Qarasaı aýdanynyń prokýrory onyń kishkentaı balalary bar ekenin eskerip, Almaty oblysynyń sotynan jazasyn úsh táýlikten eki táýlikke azaıtýdy suraǵan.  

"Búgin keshke kútpegen jerden jáne meniń jaqyndaryma habarlamasatan taǵy bir sot otyrysy boldy. Meni sotqa jetkizdi jáne sot otyrysy vıdeo baılanys arqyly ótti. Almaty oblystyq soty jazamdy eki kúnge ózgertti. Meni qazir ǵana Qarasaı aýdandyq ishki ister bóliminiń basshylyǵy úıime ákelip tastady. Múmkin erteń bolatyn qoldaýdan qoryqqan shyǵar" dep jazdy Mamaı. 

Úsh kún buryn, 20 aqpanda Janbolat Mamaı azamattardy 22 aqpan kúni saǵat 11.00-de "Astana" alańyna mıtıngige kelýge shaqyrǵan. Sonyń ertesinde, 21 aqpan kúni keshke qaraı Mamaıdy Qaskeleń qalasynda polısııa ustap, Qarasaı aýdandyq ishki ister bólimine jetkizdi. Onyń ustalǵanyna narazy bolǵan jaqtastary 21 aqpan keshki 23.00-den bastap Qarasaı aýdandyq ishki ister bólimniń aldynda ashtyq jarııalap, bılikten ony bostýdy talap etti. Al 22 aqpan kúni tańǵy beste Mamaıdyń "mıtıngige shaqyrdy" degen aıyppen úsh táýlikke qamalǵany belgili boldy. 

31 jastaǵy Janbolat Mamaı Qazaqstanda oppozııalyq belsendi, táýelsiz jýrnalıst retinde tanymal. Ol 2017 jyly "Muhtar Áblıazovtyń qarjysyn gazet arqyly zańdastyrmaq boldy" degen aıyppen úsh jyl merzimge shartty jazaǵa kesilip, sot onyń úsh jyl jýrnalıstik qyzmetpen aınalysýyna tyıym salǵan edi. Mamaı qazir probasııalyq baqylaýda. 

О́tken jyldyń qazan aıynda Mamaı bastaǵan bir top belsendi bılikke oppozııasııa retinde "Demokratııalyq partııa" quratyndaryn málimdegen. 2019 jyly 26 jeltoqsanda Ádilet mınıstrligi bastamashyl topty tirkegen. Keıin Mamaı 22 aqpanda Almatyda "Dempartııanyń" quryltaıyn ótkizetinin habarlaǵan.​

Al osy jyly 19 aqpanda "Dempartııanyń" bastamashyl toby Almatyda baspasóz máslıhatyn ótkizip, partııa jaqtastaryna qysym jasalyp jatqandyqtan  22 aqpanǵa josparlanǵan quryltaı ótpeıtinin, onyń ornyna "mıtıngige shyǵatyndaryn" málimdegen bolatyn.