"Shal ket!", "Oıan, Qazaqstan!". Polısııa "Áblıazov shaqyrǵan mıtıngige" kelgenderdi ustaı bastady

22 aqpan kúni tústen keıin Almatydaǵy "Astana" alańynynyń mańynda Fransııada turatyn qýǵyndaǵy eks-bankır Muhtar Áblıazov jetekshilik etetin "Qazaqstannyń demokratııalyq tańdaýy" (QDT) uıymynyń mıtıngisine kelgender ákimdik ókilderiniń tarańyzdar degen talabyn elemedi. Taramaǵandardy polısııa birtindep ustap, arnaıy kólikterge kúshtep tıedi.

Oqıǵa ornynda júrgen Qamshy tilshisiniń habarlaýynsha, polısııa azamattardy "mıtıngi ótedi" degen "Astana" alańyna jetkizbeı, avtozaktarǵa salyp áketip jatyr. Polısııa ustaǵan narazylardyń keıbiri "Oıan, Qazaqstan!", "Shal ket!" dep aıqaılaǵan.

"Mıtıngi ótedi" degen alań túgeldeı polısııa men arnaıy jasaqtyń baqylaýynda. Arnaıy jasaq ókilderi arasynda áıelder jasaǵy da júr.

Alań aýmaǵynda ınternet múldem istemeı tur.

Túske deıin dál osy "Astana" alańynda "Qazaqstan bıligine oppozısııamyz" dep júrgen taǵy bir uıym – "Demokratııalyq partııa" belsendileri de mıtıngi ótkizbekshi boldy. Olardyń bir shoǵyryn tańǵy saǵat 9.30-da alańǵa jetkizbeı polısııa ustap alyp ketti.

Al osy uıymnyń on shaqty belsendisi "Astana" alańyna jetip, sol mańdaǵy Álııa men Mánshúk eskertkishiniń aldynda bılikke óz talaptaryn aıtty. Olar keshe Qaskeleń qalasynda ustalyp, "mıtıngige shaqyrdy" degen aıyppen úsh táýlikke qamalǵan "Dempartııa" bastamashyl tobynyń jetekshisi "Janbolat Mamaı men basqa da ustalǵan belsendilerdi bosatsyn" degen talap qoıdy. Olarǵa ákimdik qyzmetkerleri men prokýratýra ókilderi eskertý jasap, taraýǵa shaqyrdy. Sodan keıin polısııa belsendilerdiń barlyǵyn ustap áketti. Ustalǵandardyń arasynda saıasatker Tólgen Júkeev pen Janbolat Mamaıdyń áıeli, "Jas Alash" gazetiniń bas redaktory Inga Imanbaı da bar. Biraq túskiten keıin Imanbaı Facebook paraqshasynda post jazyp, polısııa ózin  bosatqanyn habarlady. 

Buǵan deıin QDT qozǵalysynyń jetekshisi Muhtar Áblıazov ta, "Dempartııa" bastamashyl tobynyń jetekshisi Janbolat Mamaı da óz jaqtastaryn 22 aqpan kúni "Astana" alańyna mıtıngige shaqyrǵan bolatyn. Qazaqstannyń bas prokýratýrasy 21 aqpanda Áblıazovty "alaıaq, adam óltirýshi" dep qaralap, el azamattaryna ol shaqyrǵan jıynǵa barmaýǵa keńes bergen bolatyn. 

Azamattardy bir kúnge, bir jerge mıtıngige shaqyrǵanymen Mamaı men Áblıazov sońǵy kezderi bir-birin jıi synap júr. Uıymy Qazaqstanda "ekstrımıstik" dep tanylǵan Áblıazov Mamaıdy "bıliktiń jobasy" dep esepteıdi, al Mamaı ózi quraıyn dep júrgen "Demokratııalyq partııany" naǵyz "oppozısııalyq uıym" bolady dep aıtady.