Janbolat Mamaı 3 táýlikke qamaldy

Dempartııa qurý boıynsha yntaly top jetekshisi, oppozısııalyq saıasatker Janbolat Mamaı "ruhsat etilmegen mıtıngige shaqyrdy" degen aıyppen úsh táýlikke qamaldy.

Qoǵam belsendisinyń zaıyby, jýrnalıst Inga Imanbaıdyń facebook paraqshasyna jazýynsha, Almaty oblysy Qarasaı aýdandyq mamandandyrylǵan ákimshilik sottyń bul sheshimi 22 aqpanda tańǵy saǵat 5-te aıtylǵan. Oǵan deıin Janbolat Mamaıǵa eshkimdi kirgizbegen. Quqyqqorǵaýshy Janar Balǵabaev da oppozısııalyq saıasatkerdiń 50-ge jýyq jaqtasymen birge aýdandyq ishki ister bólimi ǵımaratynyń aldynda kire almaı turǵan.

Polısııa keshe yntaly top múshesi Janbol Rahmatýllany ustaǵan. Mamaı men onyń jaqtastary Rahmatýlannyń soty ótetin Qarasaı aýdandyq sotyna barǵanda Mamaıdyń ózi ustalǵan.

Artynsha Dempartııa qurý boıynsha yntaly top jaqtastary Almaty oblysy Qarasaı aýdandyq ishki ister bólimi ǵımaratynyń aldyna jınala bastady. Olar Janbolat Mamaıdy bosatýdy talap etip, 10 shaqty azamat tótenshe shara retinde ashtyq jarııalady.

Búgin Demokratııalyq partııa bastamashyl toby músheleriniń biri Saılaý Lepesovtyń qamalǵany týraly aqparat shyqty.

19 aqpanda Mamaı bastaǵan "Dempartııa" yntaly tobynyń ókilderi 22 aqpanǵa josparlanǵan quryltaı sezd ótpeıtinin, onyń ornyna sol kúni mıtıngige shyǵatynyn aıtqan. Al 20 aqpanda Janbolat Mamaı azamattardy 22 aqpan kúni Almatydaǵy "Astana" alańyna mıtıngige kelýge shaqyrǵan bolatyn.

Yntaly top jetekshisiniń jaqtastary áleýmettik jelilerde búgin mıtıngi bolatynyn, "Janbolat Mamaıdy bosatýyn talap etetinderin" habarlaýda.