Qazaqfılm men Aqan Sataev sottasyp jatyr

Qazaqfılm men rejısser Aqan Sataev bir-birimen «Tomırıs» fılmi úshin sottasyp jatyr. Kınostýdııa SATAI FILM kompanııasy memlekettik satyp alýlar týraly kelisimshartty buzyp, qarjylyq esepti tolyq tapsyrmady dep aıyptady. Al rejısser kelisimshartta qujattardyń naqty tizimi jasalmaǵanyn alǵa tartyp otyr, dep jazady azattyq-ruhy saıty.

Jaqynda buqaralyq aqparat quraldarynda «SATAIFILM» JShS Qazaqfılm kınostýdııasynan «Tomırıs» fılmi úshin 9 mıllıonnan astam teńge tóleýin talap etip, sotqa bergeni týraly aqparat taraǵan edi. Olardyń daýyna kelisimshartta qujattardyń naqty tizimi jazylmaǵany sebep bolǵany da aıtylǵan.

Qazaqfılm men «SATAIFILM» JShS kelisimshartty 2019 jyldyń 12 mamyrynda jasaǵan. Zań boıynsha kompanııa kelisimsharttaryn byltyrǵy jyldyń 31 jeltoqsanyna deıin oryndaýy kerek bolǵan. Degenmen, Esep komıteti júrgizgen memlekettik aýdıtten keıin arnaıy komıssııa qurylyp, tehnıkalyq talaptardyń oryndalmaǵany anyqtaldy.

«Aqan Sataevtyń stýdııasy memlekettik satyp alý týraly kelisimdi oryndaý boıynsha qarjylyq esepti tolyq tapsyrmaǵan. Olar úsh kún ishinde bul olqylyqty joıýy kerek edi. Degenmen, SATAIFILM kompanııasy qosymsha qujattardy (shyǵyndardy dáleldeıtin kelisimshart, akt, shot-faktýra) tapsyrmady»  dedi Qazaqfılmniń baspasóz qyzmeti.

Olardyń habarlaýynsha, kınostýdııa da Aqan Sataevtyń kompanııasyn sotqa bergen.

– Belgili bir áreket algorıtmi bar jáne biz ony anyq ustanamyz. Rejısserdiń eńbegi, fılmniń sapasy, osy máselede alynǵan memlekettik qarjylandyrý mólsheri mańyzdy emes. Zańdy baqylaıtyn sharttyń merzimi men talaptary saqtalǵany mańyzdy. Reseı kınoındýstrııasynda osyndaı jaǵdaılardyń oryn alatynyn aıta ketken jón: belgili bir kompanııalar memleketten fılmder túsirýge aqsha alyp, keıin qajetti túrde esep bere almaıtyn jaǵdaılar oryn alady, bul sot talqylaýyna ákep soǵady, – dedi «Qazaqfılm» kınostýdııasynyń ekonomıka jáne josparlaý bóliminiń basshysy Vıktorııa Chernova.

Eske sala keteıik, rejısser Aqan Sataevtyń «Tomırıs» fılmi 27-qyrkúıekte prokatqa shyqqan bolatyn. Bizdiń zamanymyzǵa deıingi VI ǵasyrda bolǵan oqıǵany sýretteıtin fılmdi túsirýge QR Mádenıet jáne sport mınıstrligi tapsyrys bergen edi.