20 Aqpan, 2020 NEWS

Tórt qazaqstandyq otyrǵan kemeniń eki jolaýshysy koronovırýstan qaıtys boldy

Japonııanyń Iokogama portynda karatınde turǵan Diamond Princess kemesi

Japonııanyń Iokogama portynda koronovırýsqa baılanysty eki apta karantınde turǵan Diamond Princess laıneriniń eki jolaýshysy kóz jumdy. Bul aqparatty  japonııalyq "En-eıch-keı" telearnasy memleketik aqparat kózderiniń birine silteme jasap habarlady, alaıda derekkózdiń aty atalmady. 

Telearnanyń málimetinshe, vırýstyń saldarynan mert bolǵandar áıel men er adam. Ekeýiniń de jasy 80-nen asqan Japonııa azamaty. Olardan 11-12 aqpan kúnderi vırýs anyqtalyp, emhanaǵa jatqyzylǵan. Biraq ekeýinde de vırýs juqtyrǵanǵa deıin basqa aýrýlary bolǵan. 

Diamond Princess kemesi eki apta boıy Iokogama portynda karantınde turdy. Japonııa bıligi keshe ǵana karantın merzimi aıaqtalǵanyn habarlap, koronavırýs anyqtalmaǵan jáne onyń belgileri joq 500 jolaýshynyń jaǵaǵa shyǵýyna ruqsat berdi. Kemede vırýs juqtyrǵan adamdar áli tirkelip jatyr. Kemedegi naýqastardyń sany 621-ge jetti. Bul Qytaı shekarasynan tys aýmaqta Covid-19 vırýsyn juqtyrǵandardyń eń úlken shoǵyry. Karantın kezinde ınfeksııa jolaýshylar arasynda tez tarap ketti. Birneshe memleket karantın bitkenshe azamattaryn evakýsııalady. Ázirge kemeden qart adamdar shyǵaryldy. Karantın bastalǵan ýaqytta laınerde 3700 jolaýshy men ekıpaj múshesi bolǵan.

Bul kemede tórt Qazaqstan azamaty bar. Keshe Qazaqstannyń syrtqy ister mınıstrligi kemedegi tórt qazaqstandyq 19 aqpanda karantınnen shyǵady, qosymsha testen aman-esen ótse, jaqyn arada Qazaqstanǵa oralady dep málimdegen edi. Syrtqy ister mınıstrliginiń aıtýynsha, tórt azamattan koronavırýs tabylmaǵan. Olar jaqyn kúnderi Qazaqstan men Japonııa arasyndaǵy tikeleı reıs arqyly elge jetedi. Biraq olar jol shyǵynyn ózderi óteıdi.

Qytaı bıligi beısenbi kúni vırýs juqtyrǵandar men qaza tapqandar sanyna qatysty jańa derek usyndy: qaıtys bolǵandar sany - 2112, bir kún burynǵy málimetten 108-ge kóp. Jalpy indet juqtyrǵandar 74 myńnan asty, ótken táýlikte 628 jańa oqıǵa tirkeldi.



Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir