"Maǵan «demagog» kerek emes": Batalov esebinen soń Taldyqorǵan qalasy ákiminiń orynbasaryn jumystan shyǵarýdy tapsyrdy

Bul týraly Almaty oblysynyń ákimi Amandyq Batalov aıtty dep habarlaıdy Qamshy.kz aqparat agenttigi. 

Oblys basshysynyń bulaı ashý shaqyrýyna Taldyqorǵan qalasynyń turǵyny Lıazzat Qudaıbergen kótergen máselesiniń áli kúnge deıin sheshilmeýi sebep boldy. Dálirek aıtqanda,  eseptik jıyn aıaqtalar tusta qala turǵyny oblys ákiminen óz shaǵymyn tyńdaýdy ótindi. Amandyq Batalov tórt balasy bar jalǵyz basty anaǵa jaǵdaıyn jıynnan soń tyńdaıtyny aıtty.

Budan soń zaldyń shyǵa berisinde ákimdi kútken Lıazzat Qudaıbergen Amandyq Batalovqa óz máselesi boıynsha janaıqaıyn jetkizdi.

«Men sizge qarasha aıynda jolyqqan bolatynmyn. Siz qala ákiminiń orynbasary Ashat Meıramǵalıulyna tapsyrma berdińiz. Biraq osy ýaqytqa deıin eshqandaı máselem sheshilgen joq. 21 jyldan astam ýaqyttan beri ata-anamnan qalǵan páterimniń qujattaryn rásimdeı almaı júrmin. Men kópbalaly anamyn, jalǵyz basty. Qaıda baramyn endi, bilmeımin», - dedi Lıazzat Qudaıbergen.

О́z kezeginde aımaq basshysy kópbalaly anadan máselesiniń ne sebepti sheshilmegenin surady.

«Amandyq Batalovqa kirseńiz boldy, másele sheshiledi dep oılaısyz ba?», - dedi maǵan Ashat Meıramǵalıuly. «Pálenbaı mıllıon halyq bar, bárine kómektese bersem nem qalady, aqshańdy shyǵar da óziń jasa» dedi. Eger meniń aqsham bar bolsa, men ondaı kómek suramas edim. Men sizden turǵyn-úı, qarajat surap turǵan joqpyn. Áke-sheshemnen qalǵan óz úıimniń qujattaryn rásimdeı almaı turmyn. Bazada ol úı joq. Úkimetke ótpegen. Qurylys bolyp, tapsyrylmaǵan. Sol kúıi árkim óz betinshe kirip alǵan. Men ol jerde tirkeýde turmyn», - dedi Lázzat Qudaıbergen.

Osy rette, Amandyq Batalov Taldyqorǵan qalasy ákiminiń orynbasary Ashat Qalıasqarovty shaqyryp, ózine berilgen tapsyrmany ne sebepti oryndamaǵanyn surady. Sheneýniktiń jaýabyna qanaǵattanbaǵan oblys ákimi máseleni osynsha ýaqyt sozbaı arnaıy quramdaǵy komıssııamen-aq sheshýge bolatynyn aıta kelip:

«Maǵan «demagog» kerek emes. Aryzyńdy jaz da, bar...Men keshe baıqaǵanmyn. Halyq maǵan kelgende, ol jóndi  jaýap ta bere alǵan joq. Mundaı adamdy «demagog» dep ataıdy. Demagog kerek emes. Aryzyn jazsyn. Sodan keıin myna kisiniń máselesin sheship berińder», - dedi.

Ári Taldyqorǵan qalasynyń ákimi Ǵalymjan Ábdiraıymovqa ózine isker orynbasar tabýdy tapsyrdy.