QR prezıdenti Qasym-Jomart Toqaev 14-15 aqpan kúnderi Germanııada resmı saparmen boldy. Prezıdent onda Qaýipsizdik jónindegi 56-shy Mıýnhen konferensııasyna qatysý úshin barǵan, dep habarlaıdy QazAqparat.

Q.Toqaev konferensııadan tys álemdik kóshbasshylarmen, halyqaralyq uıymdardyń jáne Germanııanyń iri kompanııalarynyń jetekshilerimen, sondaı-aq halyqaralyq qatynastar salasyndaǵy bedeldi sarapshylarmen kezdesý ótkizip úlgerdi.

Prezıdent kelissózderdi Germanııanyń iri kompanııa basshylary – «BayWa AG» kompanııasynyń basqarma tóraǵasy Klaýs Lýtspen, «Rhenus SE&Co.KG» kompanııasynyń basqarma múshesi Mıhael Vıferspen jáne «Reverse Logistics Systems GmbH» kompanııasynyń basqarma tóraǵasy Patrık Vıdemannmen ekijaqty kezdesýler ótkizýden bastaldy.

Iri aýylsharýashylyq kompanııasynyń basshysy K. Lýtspen bolǵan kezdesýde energııa kózderin qaıta qalpyna keltirý jáne agroónerkásip keshenin sıfrlandyrý salalary boıynsha birlesken ınvestısııalyq jobalardy júzege asyrýdyń basymdyqtary egjeı-tegjeıli talqylandy.

Prezıdent Qazaqstannyń Germanııa bıznesimen aradaǵy tyǵyz ári jemisti yntymaqtastyqty damytýǵa basa mán beretinin atap ótti. Osy oraıda kásipkerdiń nazaryn elimizdegi energııa kózderin qaıta qalpyna keltirý jáne tyńaıtqyshtar óndirý baǵytynyń áleýetin arttyrýdyń mańyzdylyǵyna aýdardy.

Mıhael Vıferspen kezdesý kezinde kólik-logıstıka salasy boıynsha birlesken ınfraqurylymdyq jobalardy iske asyrý perspektıvalary pysyqtaldy. Memleket basshysynyń Patrık Vıdemannmen ótkizgen kezdesýinde Qazaqstanda bos ydystardy qaıta aınalymǵa jiberýdiń kepildik-qaıtarymdyq júıesi jónindegi jobanyń júzege asyrylý qadamdary sóz boldy.

«Reverse Logistics Systems GmbH» kompanııasynyń basshysy materıaldar men qaldyq zattardy qaıta óńdeý salasynda tıisti ekojúıe qurý úshin Qazaqstanmen yntymaqtastyq ornatýǵa daıyn ekenin aıtty.

Qasym-Jomart Toqaev qaýipsizdik jónindegi 56-shy Mıýnhen konferensııasy aıasynda Kanadanyń premer-mınıstri Djastın Trıýdomen kezdesip, kelissóz júrgizdi. Taraptar Qazaqstan men Kanada arasyndaǵy saýda-ekonomıkalyq, ınvestısııalyq jáne mádenı-gýmanıtarlyq yntymaqtastyqtyń qazirgi ahýaly men perspektıvalaryn talqylap, halyqaralyq uıymdar aıasyndaǵy yqpaldastyqty qarastyrdy.

Sondaı-aq halyqaralyq kún tártibindegi ózekti máseleler boıynsha pikir almasty. Kanada úkimetiniń basshysy saıası jáne ekonomıkalyq reformalardy júzege asyrý jónindegi Qazaqstan prezıdentiniń kúsh-jigerin joǵary baǵalap, azamattyq qoǵam men demokratııany damytý salasyna qoldaý kórsetýge daıyn ekenin jetkizdi.

14 aqpan tústen keıin memleket basshysy Ekonomıkalyq yntymaqtastyq jáne damý uıymynyń Bas hatshysy Hose Anhel Gýrrıamen kezdesý ótkizdi. Qasym-Jomart Toqaev Qazaqstannyń Ekonomıkalyq yntymaqtastyq jáne damý uıymynyń standarttaryn engizýge, saıası jáne ekonomıkalyq reformalardy júzege asyrý barysynda atalǵan bedeldi uıymmen belsendi yqpaldastyqty jalǵastyrýǵa basa mán beretinin aıtty. О́z kezeginde A. Gýrrıa Qazaqstanmen arada yntymaqtastyq baılanystar nyǵaıyp kele jatqanyn atap ótti.

Men búgingi kezdesýge óte qýanyshtymyn. Biz kóptegen mınıstrlermen birlesip jumys istedik. Osy oraıda qarym-qatynastyń jyl sanap damyp kele jatqanyn atap ótkim keledi. Búgingi kezdesýge shyn júrekten qýanyshtymyn. Bıyl yntymaqtastyǵymyz odan ári órleı túsedi degen senimdemin,  dedi Anhel Gýrrıa.

Budan bólek Qazaqstan prezıdenti Mıýnhenge jasaǵan jumys sapary barysynda Ázerbaıjan prezıdenti Ilham Álıevpen de kezdesti. Ázerbaıjan prezıdenti bıyl eki eldiń qarym-qatynasy jemisti bolatynyna senimdi ekenin atap ótti.

Kóptegen birlesken jobalar iske asyrylýda. 2020 jyl da eki eldiń baılanysy úshin tabysty bolady degen senimdemin. Taýar aınalymyn arttyrýdy kózdep otyrmyz, sondaı-aq transport, týrızm salasyndaǵy seriktestiktiń áleýeti zor. Eki el arasynda tyǵyz baılanys ornaǵan,  dedi Ilham Álıev.

Kezdesý sońynda Qasym-Jomart Toqaev Ilham Álıevti Qazaqstanǵa resmı saparmen kelýge shaqyrdy.

Sonymen qatar, 15 aqpan kúni túske deıin Qasym-Jomart Toqaev alty kezdesýdi qatarynan ótkizdi.

Osy oraıda Kýveıttiń Premer-Mınıstri sheıh Sabah Halıd ál-Hamad as-Sabahpen, Aýǵanstan Prezıdenti Ashraf Ǵanımen, «Siemens AG» kompanııasynyń atqarýshy dırektory Djo Kezermen, «Eurasia Group» zertteý jáne konsaltıng kompanııasynyń negizin qalaýshy Iаn Bremmermen pikir almasty.

Munymen qosa, Qazaqstan Prezıdenti Dúnıejúzilik densaýlyq saqtaý uıymynyń Bas dırektory Tedros Adhan Gebreıesýspen jáne Halyqaralyq Qyzyl Krest komıtetiniń prezıdenti Peter Maýrermen kezdesýge aıryqsha mán berdi.

Peter Maýrermen júzdesýde Qazaqstan men Halyqaralyq Qyzyl Krest komıteti arasyndaǵy baılanystardy odan ári nyǵaıtý máseleleri qaraldy. Osy oraıda halyqaralyq kún tártibindegi ortaq máseleler týraly pikir almasyldy. Kezdesý sońynda Memleket basshysy Qazaqstan men Halyqaralyq Qyzyl Krest komıtetiniń arasyndaǵy yntymaqtastyqty damytýǵa qosqan úlesi úshin Peter Maýrerge II dárejeli «Dostyq» ordenin tapsyrdy.

Mıýnhen konferensııasy

Jumys saparynyń birinshi kúninde Qasym-Jomart Toqaev qaýipsizdik jónindegi 56-shy Mıýnhen konferensııasynyń resmı ashylý rásimine qatysty. Atalǵan is-sharaǵa 40-qa jýyq memlekettiń basshylary, 100-den astam syrtqy ister jáne qorǵanys mınıstrleri, halyqaralyq qatynastar salasyndaǵy bedeldi sarapshylar, Eýrokomıssııa ókilderi, sondaı-aq Eýropalyq Parlament depýtattary keldi.

Konferensııa kún tártibinde «EO men NATO bolashaǵy», «Kıberqaýipsizdik», «Densaýlyq saqtaý máseleleri», «Saýda soǵystary men sanksııalar», «Jalǵan aqparat, nasıhat pen kúmándi jańalyqtar», «Taıaý Shyǵystaǵy ahýal», sondaı-aq Eýropalyq Odaq, AQSh, Reseı, Qytaı jáne basqa da eldermen aradaǵy ózara qatynastar taqyryptary talqylandy.

Konferensııanyń ekinshi kúnindegi «Geografııalyq ornalasýdyń mańyzy: Ortalyq Azııadaǵy qazirgi jaǵdaı» taqyrybyndaǵy ótken paneldik pikirtalas kezinde Qasym-Jomart Toqaev kórshiles eldermen ózara tıimdi qarym-qatynas týraly aıtty. Halyqaralyq qatynastar keńesiniń prezıdenti Rıchard Haas jetekshilik etken pikirtalasqa Aýǵanstan Islam Respýblıkasynyń Prezıdenti Muhammed Ashraf Ǵanı qatysty.

Memleket basshysy jıynǵa qatysýshylarǵa prezıdent qyzmetindegi basymdyqtary, elimizdegi saıası jáne ekonomıkalyq reformalardyń negizgi baǵyttary týraly aıtyp berdi. Osy rette Prezıdent ekonomıkany ártaraptandyrýdyń, ınnovasııalar men sıfrlandyrýdy damytýdyń asa mańyzdy ekenine nazar aýdardy. 

BUU-nyń bedeli men Astana prosesi Atalǵan bedeldi konferensııada BUU aıasyndaǵy yntymaqtastyq taqyryby sarapshylardyń erekshe nazarynda boldy. Bul turǵyda Mıýnhen qaýipsizdik konferensııasynyń tóraǵasy Volfgang Ishınger álem kóshbasshylaryn BUU-nyń bedelin nyǵaıtý isine belsendi atsalysýǵa shaqyrdy.

– Ashyǵyn aıtý kerek, ujymdyq kúsh-jiger eń qaýipti daǵdarystar men halyqaralyq qaýipsizdiktiń qaterlerin retteý úshin jetkiliksiz. Adamdardyń ómiri qıylyp jatyr, qarýlaný jarysy jańa qarqyn ala bastady, jahandyq jylyný jalǵasýda. Sondyqtan álemdegi eń yqpaldy adamdardyń bul turǵyda tek sharasyzdyq tanytýy durys emes. Atap aıtqanda, bul ahýal qazirgi qaýipti jaǵdaıda óte tıimsiz bolyp tur, – dedi V. Ishınger Mıýnhen qaýipsizdik konferensııasynyń 56-shy otyrysynda.

Ilmek sózder: prezıdent sapary

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir