Terrorlyq qylmys úshin sottalǵan azamat óz-ózine qol saldy

Aqtóbedegi terrorlyq aktige qatysqany úshin ómir boıyna bas bostandyǵynan aıyrý jazasyna kesilgen Ashat Imanǵalıev óz-ózine qol jumsaǵan. Ol Arqalyq qalasynyń mańyndaǵy jabyq túrmede jazasyn ótep jatqan. Bul týraly Ishki ister mınıstrliginiń Qylmystyq-atqarý júıesi komıteti habarlady, dep jazady Azattyq.

Ishki ister mınıstrligi Qylmystyq-atqarý júıesi komıteti tóraǵasy mindetin atqarýshy Tenızjan Jánibekov quzyrly organdardyń sotqa deıingi tergeýdi júrgizip jatqanyn jetkizdi. Ol tergeý amaldarynyń barysy qupııa bolǵandyqtan, málimet berýden bas tartty.

Ashat Imanǵalıev 1986 jyly Aqtóbe oblys, Qobda aýylynda dúnıege kelgen. Túrmege túskenge deıin Aqtóbedegi saýda ortalyqtarynyń birinde uıaly telefon satýmen aınalysqan. Tergeý málimetinshe, ol Pallada qarý-jaraq dúkeni men áskerı bólimge qarýly shabýyl jasaǵandardyń quramynda bolǵan.

2016 jylǵy 5 maýsymda Aqtóbede qarý-jaraq satatyn dúken men áskerı bólimge bir top azamattyń qarýly shabýyly saldarynan tórt jergilikti turǵyn men úsh áskerı qyzmetker qaza tapty. Arnaıy operasııa nátıjesinde 20 shaqty adam ustalyp, terrorlyq shabýylǵa qatysqan 18 adam qatań jazaǵa tartyldy.

2016 jylǵy 28 qarashada Aqtóbedegi sot terrorıstik shabýylǵa qatysqan 29 adamǵa úkim shyǵardy. Jeti adam ómir boıyna bas bostandyǵynan aıyryldy. Qalǵan aıyptalýshylarǵa eki jyldan 22 jylǵa deıin bas bostandyǵynan aıypý jazasy taǵaıyndaldy. Bir adam terrorlyq top týraly málimetti jasyrǵany úshin tórt jylǵa bas bostandyǵynan aıyryldy.