09 Aqpan, 2020 Dástúr

"Adamzattyń alyby – hakim Abaı" atty respýblıkalyq aqyndar aıtysy ótti

Qamshy.kz

 

Elordada qazaqtyń uly aqyny, kemeńger Abaıdyń 175 jyldyq mereıtoıyna arnalǵan «Adamzattyń alyby – hakim Abaı» atty respýblıkalyq aqyndar aıtysy ótti. Elbasy N.Á.Nazarbaevtyń «Rýhanı jańǵyrý» baǵdarlamasy aıasynda «Nur Otan» partııasynyń  qoldaýymen jáne QR Mádenıet jáne sport mınıstrliginiń uıymdastyrýymen ótken jyr alamany bıyl ótetin aıtystardyń betashary boldy.

Aıtysty belgili aqyn, aıtys janashyry Júrsin Erman ashyp, júrgizip otyrdy. Ol óz sózinde búginde ulttyq qundylyqtarymyzdy dáriptep, uly tulǵalarymyzdy ulyqtap, tarıhı ótkenimizdi aıshyqtap otyrýymyz – el Táýelsizdiginiń arqasy, aǵa býynnyń qajyrly eńbeginiń jemisi ekenin erekshe atap ótti.

- Prezıdentimiz bıylǵy jyldy Abaı jyly dep jarııalady. Jaqynda ǵana Abaıǵa arnalǵan is-sharalardyń bastaýyn ózi kelip ashyp berdi. «Abaı jáne XXI ǵasyrdaǵy Qazaqstan» atty maqalasyn bárińiz oqyǵan shyǵarsyzdar. Bıylǵy kóptegen sharalar Abaıǵa arnalady. Abaı - bizdiń qaǵbamyz, qazaq rýhanııatynyń temirqazyǵy. Bárimiz boıymyzdy da, oıymyzdy da Abaıǵa qarap túzeýimiz kerek, - dedi Júrsin Erman.

Alaman aıtysqa barlyǵy 16 aqyn qatysty. Saıdyń tasyndaı iriktelgen aıtýly aqyndar sóz saıysyna Abaı murasyn arqaý etip, uly oıshyl usynǵan asyl oılardy, óshpes qundylyqtardy keńinen tolǵady. Uly Abaı ósıetindegi óskeleń urpaqtyń boıyna jasampazdyq rýhyn sińirý, oıshyl synaǵan jaǵymsyz qylyqtardan arylý, kemeńger siltegen adamshylyq jolyn ustaný – aıtystyń negizgi taqyrybyna aınaldy.

Bul aıtystyń burynǵy aıtystardan basty ereksheligi sóz saıysyna túsetin aqyndardyń sahnada jerebe tartý arqyly tutqıyldan juptalýy boldy.

Alaman aıtystyń bas júldesi belgili aqyn, «Altyn dombyranyń» eki dúrkin jeńimpazy Muhtar Nııazovqa buıyrdy. Al birinshi oryndy Syr eliniń aqyny Meıirbek Sultanhan ıelense, ekinshi oryndy Erkebulan Qaınazarov pen Serik Qýanǵan oljalady. Úshinshi oryndy Tilegen Ádilov, Ásem Erejeqyzy, Raýan Qaıdarovtar aldy.

Eske sala keteıik, byltyr «Nur Otan» partııasynyń qoldaýymen elimizdiń óńirlerinde onǵa jýyq respýblıkalyq aqyndar aıtysy ótti. Atap aıtqanda, Atyraýda F.Ońǵarsynovanyń 80 jyldyǵyna, Qaraǵandyda S.Seıfýllınniń 125 jyldyǵyna, Qostanaıda B.Maılınniń 125 jyldyǵyna oraı jáne Almaty qalasynda «Otan otbasynan bastalady» atty respýblıkalyq aqyndar aıtysy uıymdastyrylyp, jyr alamany Batys Qazaqstan oblysynda «Altyn dombyra» aıtysymen qorytyndylandy.

Endi mine, sol úrdis bıyl da jalǵasyn taýyp otyr. Hakim Abaıdyń 175 jyldyǵyna oraı respýblıkalyq, oblystyq jáne aýdandyq deńgeıdegi 20-ǵa jýyq aqyndar aıtysy ótedi dep josparlanýda. Odan bólek, Ábý Nasyr ál-Farabıdiń 1150 jyldyǵyna jáne Uly Jeńistiń 75 jyldyǵyna arnalǵan aqyndar aıtystary uıymdastyrylady.

 

 

 

Ilmek sózder: Aıtys

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir