Aqjarqyn Turlybaı raqymshylyqqa ilige me?

Qytaıda ómir boıyna sottalǵan Aqjarqyn Turlybaı Qazaqstanǵa qaıtarylsa, raqymshylyqqa iligýi múmkin. Bas prokýrordyń orynbasary Marat Ahmetjanov osylaı dedi, dep habarlaıdy 24.kz.

Ahmetjanovtyń aıtýynsha, qazir aıyptalýshy Qytaı sotynyń úkimimen kelispeı, appelıasııalyq shaǵym túsirgen.

Osy prosess aıaqtalǵan soń bas prokýratýra ókilderi ony elge qaıtaryp alý máselesimen aınalysady. Qazir Qazaqstan men Qytaı arasynda sottalǵandardy ekstradısııalaý týraly kelisim bar. Sonyń negizinde Aqjarqyn Turlybaıdy elge aldyrýǵa múmkin bolady. Eger elge qaıtyp, raqymshylyq naýqany ótkizilse, isti bolǵan qazaq qyzyna keshirilim berilýi ábden múmkin.

Qazaqstandyq tarap qazir Qytaı sotynyń sheshimi zańdyq kúshine engenin kútip otyr.

Biz resmı túrde Qytaı memleketine ondaı aryz-shaǵym túsip jatqan kezde eger ol kisiler jazasyn Qazaqstanda óteımiz dese, suraý jiberemiz. Bizdiń sharttar boıynsha eger Qazaqstanda raqymshylyq bolsa, árbir kelisimde ár túrli jazylǵan (qandaı memleketpen qalaı kelisemiz), ondaı múmkindikter tolyq bar, – dedi Marat Ahmetjanov, QR Bas prokýrorynyń orynbasary.