Qazaqstandyqtar kredıtke smartfon alyp, toı jasaıdy

2019 jyly buryn nesıege júginip kórmegen 580 myń qazaqstandyq 176 mlrd teńge somaǵa kredıt alǵan. Bereshektiń ortasha somasy – 303 myń teńge. Kredıttik tarıhy bar qazaqstandyqtardyń jalpy sany 9 mln-nan asady.

Bankten qaryz alýshylardyń basym bóligin ıaǵnı 67,82 paıyzyn 25-45 jas aralyǵyndaǵylar quraǵan. Nesıe rásimdegenderdiń 28,74 paıyzy – 18 ben 25 jas aralyǵyndaǵylar. 45-65 jas aralyǵyndaǵylar kredıtke meılinshe jýymaýǵa tyrysady. Bank qyzmetin paıdalanǵandardyń 3,45 paıyzy ǵana osy toptyń ókilderi.

Jastardyń deni alǵashqy nesıelerin zamanaýı gadjetter úshin alǵan. Kredıtke alynǵan tehnıkalardyń 73 paıyzy smartfondarǵa, 18 paıyzy qulaqqaptarǵa, 7 paıyzy planshetterge tıesili.

Eresekterdiń 22 paıyzy – úı, 27  paıyzy – avtokólik, 47 paıyzy – turmystyq tehnıka alý úshin, 4 paıyzy – saıahatqa shyǵý maqsatymen nesıege júgingen.

Bank qyzmetin qoldanǵan qazaqstandyqtardyń basty suranysyn úılený toılary men túrli mereıtoılar bastap tur. Osy maqsattarǵa alynǵan nesıelerdiń úlesi – 76 paıyz. Qarjy uıymy keltirgen derekke saı, Qazaqstandaǵy úılený toılarynyń 80 paıyzy qaryzǵa jasalady.

Sondaı-aq nesıe orta jáne joǵary oqý oryndarynda oqý úshin de jıi alynady.