"Qaýipsizdik keńesi taratylsyn!"

3 aqpan kúni keshke Shymkentte belsendi Nurlan Syzdyqbek qala ortalyǵynda bılikke qarsy bir adamdyq pıket ótkizip, Qaýipsizdik keńesin taratýdy talap etti dep jazady Qamshy.kz aqparat agenttigi Azattyqtyń deregin negizge alyp. 

Syzdyqbek Qazaqstandy 30 jyldaı basqaryp, byltyr naýryzda prezıdentikten ketken, biraq Qaýipsizdik keńesiniń tóraǵasy retinde bıliktiń bir tarmaǵyn ustap otyrǵan Nursultan Nazarbaevtyń ornynan ketýin, Qaýipsizdik keńesin taratýdy da talap qyldy. Ol Qytaıdyń Qazaqstandaǵy jobalaryna da narazylyq bildirdi.

Nurlan Syzdyqbek ústine kıgen aq qaǵazǵa "1993 jylǵy Konstıtýsııa qaıtarylsyn!", "Qaýipsizdik keńesi taratylsyn!", "Nazarbaev, ket!", "Qytaı ekspansııasyna jol joq!", "Qytaıdyń 55 zavody kirgizilmesin!" dep jazyp, qala ortalyǵyndaǵy iri saýda ortalyǵynyń aldynda turdy.

Belsendi ary-beri ótken turǵyndarmen tildesip, nelikten narazylyq ótkizip jatqanyn túsindirýge tyrysty.

- 1993 jyly qabyldanǵan Konstıtýsııada prezıdenttikke úmitker tórt jyldan eki ret saılanýǵa quqyly ekeni jazylǵan edi. Biraq keıinnen bir adamnyń múddesi úshin birneshe ret ózgertildi. Ata zań tek halyqtyń únimen referendým arqyly ózgertilýi kerek. Qaýipsizdik keńesiniń bıýdjeti shamamen bir oblystyń bıýdjetine teń eken. Bir oblysta ortasha eseppen mıllıon adam ómir súredi. Osynsha halyqtyń nesibesin bir keńestiń jumysyna jumsaý durys emes. Ár adam óz oıyn, pikirin bildirýge quqyly. Qazir eldiń áleýmettik jaǵdaıy nashar. Halyq kedeı. Jumyssyz júrgen jastar shetel asyp ketip jatyr. Osynyń bári janyma batady, - dedi belsendi.

Belsendiniń narazylyǵy jarty saǵatqa sozyldy. Ony polısııa qyzmetkerleri baqylap turdy.

Shymkent belsendileri sońǵy ýaqytta bılikke talap aıtqan túrli narazylyq sharalary kóbeıdi. Olar bılikten "saıası turqyndarǵa" bostandyq berýdi, "qymbatshylyqty toqtatýdy" talap etken. Belsendilerdiń keıbiri "beıbit mıtıng ótkizý zańyn buzdy" degen aıyppen aıyppul alǵan ıa birneshe táýlikke qamalyp shyqqan.