Qazaqstan koronovırýs "oshaǵy" - Ýhan qalasynan óz azamattaryn evakýasııalady

Búgin, 2 aqpanda Qazaqstan bıligi koronovırýs taralǵan Qytaıdyń Ýhan qalasynan eldiń 83 azamatyn evakýsııalady. Bul týraly úkimettiń baspasóz qyzmeti habarlady. 

Úkimettiń resmı saıtynda jarııalanǵan habarlamada evakýsııalanǵan 83 azamattyń 80-i stýdent ekeni aıtylǵan. 

"Ushý barysynda bizdiń azamattarymyzdy barlyq qorǵaý quraldarymen qamtamasyz etilgen qazaqstandyq dárigerler súıemeldedi. Densaýlyq jaǵdaıy tekserilgennen keıin elge oralǵan azamattar qaladan 7 shaqyrym jerde ornalasqan elordanyń kópbeıindi aýrýhanasy janyndaǵy ınfeksııaǵa qarsy arnaıy bólingen korpýsta 14 kúndik karantınge jatqyzyldy. Klınıka ınfeksııalyq qaýipsizdiktiń qajetti tehnologııalarymen, zamanaýı dıagnostıkalyq, emdik jáne reanımasııalyq quraldarmen jabdyqtalǵan, tıisti medısınalyq qyzmetkerleri bar. Medısınalyq mekemede evakýasııalanǵan azamattar qosymsha tekserýden, birinshi kezekte, koronavırýstyq ınfeksııaǵa testileýden ótedi. Karantın kezeńi kezinde elge kelgen adamdarmen tek asa qaýipti ınfeksııalarmen jumys isteý tájirıbesi bar medısınalyq personal ǵana baılanysta bolady. Elge jetkizilgen azamattardyń týǵan-týystary men jaqyndary habardar etildi jáne olar karantındik kezeńniń reglamentimen tanystyryldy" delingen úkimet habarlamasynda.

Úkimet baspasóz qyzmetiniń aqparatyna qarǵanda, Qyrǵyzstan, Belarýsıa, Armenııa memleketteriniń azamattary da Ýhan qalasynan evakýsııalaǵan. 

"Memleket basshysynyń tapsyrmasy boıynsha QHR-ǵa 13,6 tonna kóleminde medısınalyq buıymdar túrinde gýmanıtarlyq kómek jetkizildi. Qyrǵyzstan Respýblıkasy, Belarýs Respýblıkasy jáne Armenııa Respýblıkasy bılikteriniń ótinishi boıynsha osy elderdiń de azamattary QHR Ýhan qalasynan evakýasııalandy.Barlyq qajetti aqparatty usyný úshin táýlik boıy 1406 sall-ortalyǵy jumys isteıdi.Azamattardy jalǵan aqparatty taratpaýǵa, aqparattardy resmı derek kózderinen alyp, senýge shaqyramyz" delingen úkimet taratqan habarlamada.