Qazaqstanda 41 adam koronovırýs kúdigimen aýrýhanada jatyr

Qazaqstanda 31 qańtardaǵy esep boıynsha, 41 adam koronavırýs kúdigimen aýrýhanada jatyr. Bul týraly 31 qańtarda Nur-Sultanda ótken brıfıngte qazaqstandyq ınfeksıonıst Dınagúl Baesheva aıtty, dep habarlady Azattyq Radıosy.

- 31 qańtardaǵy derek boıynsha, 66 adam qyzýy kóterilip, jedel respıratorlyq vırýstyq ınfeksııa (ORVI) shaǵymymen aýrýhanaǵa jatqyzyldy. Keıin 25 adam aýrýhanadan shyǵaryldy. Qazir 41 adam aýrýhanada. Pasıentterden analız alyp, Almatydaǵy asa qaýipti ınfeksııalardy tekseretin ulttyq ǵylymı ortalyqqa tekserýge jiberip jatyrmyz. Almatydaǵy ortalyq PSR tásilimen koronavırýsty anyqtaı alady, - dedi Baesheva.

Densaýlyq saqtaý mınıstrliginiń málimetinshe, Qazaqstanda koronavırýs juqtyrǵandar resmı túrde tirkelmegen.

Qytaı bıliginiń 31 qańtardaǵy deregi boıynsha, koronavırýstan qaza bolǵandar sany 213 adamǵa jetken. 9692 adam vırýs juqtyryp, 102 myń adam vırýs juqtyrdy degen kúdikpen baqylaýǵa alynǵan.

30 qańtarda Dúnıejúzilik densaýlyq saqtaý uıymynyń bas dırektory Tedros Gebreıesýs koronovırýstyń taralýyna baılanysty halyqaralyq deńgeıde tótenshe jaǵdaı jarııalaǵan bolatyn.

Sońǵy aqparat boıynsha, koronovırýs juqtyrǵandar Qytaıdan bólek álemniń 20 elinde – Japonııa, Taıland, Sıngapýr, Avstralııa, Malaızııa, Koreıa, Fransııa, Germanııa, AQSh, Vetnam, BAÁ, Kanada, Italııa, Ulybrıtanııa, Úndistan, Shrı-Lanka, Nepal, Fılıppın, Kambodja, Fınlıandııada – tirkeldi. Biraq Qytaıdan tys jerlerde vırýstan kóz jumǵandar joq.