«Nur Otan» partııasynyń 200-ge jýyq múshesi partııalyq jaýapkershilikke tartylǵan

«Nur Otan» partııasy Tóraǵasynyń birinshi orynbasary Baýyrjan Baıbek Qazaqstan Respýblıkasynyń sybaılas jemqorlyqqa qarsy is-qımyl agenttiginiń alqa otyrysyna qatysty.

Baýyrjan Baıbek Elbasy, «Nur Otan» partııasynyń lıderi Nursultan Nazarbaevtyń partııa organdarynyń aldyna sybaılas jemqorlyqqa qarsy jumys formaty men tásilderin jetildirý boıynsha naqty mindetter qoıylǵanyn atap ótti.

– Partııa janyndaǵy Sybaılas jemqorlyqqa qarsy is-qımyl jónindegi respýblıkalyq qoǵamdyq keńes sybaılas jemqorlyqqa qarsy ózekti máseleler ótkir talqylanyp, osy baǵytta zańnamany jetildirý boıynsha naqty usynystar engiziletin belsendi alańǵa aınaldy. 2019 jyldyń 2-shi jartyjyldyǵynda ortalyq jáne aımaqtyq deńgeıde Sybaılas jemqorlyqqa qarsy is-qımyl jónindegi qoǵamdyq keńesterdiń otyrystary ótkizilip,  bilim berý salasyndaǵy sybaılas jemqorlyqqa qarsy is-qımyl, «Eńbek» memlekettik baǵdarlamasyn iske asyrý, halyqty sapaly aýyz sýmen qamtamasyz etý suraqtary, sonymen birge aımaqtyq Keńesterdiń  jumysy qaraldy, – dedi Baýyrjan Baıbek.

Partııa tóraǵasy Birinshi orynbasarynyń aıtýynsha, osy kezge deıin quqyqbuzýshylyqtarǵa jol bergeni úshin partııanyń 196 múshesi, atap aıtqanda, Aqtóbe, Shyǵys Qazaqstan jáne Qyzylorda oblystary ákimderiniń orynbasarlary, oblystyq basqarmalar men aýdan ákimdikteriniń basshylary partııalyq jaýapkershilikke tartylǵan. 2019 jyldyń 2-shi jartyjyldyǵynda ǵana 96 partııa múshesi sybaılas jemqorlyq quqyq buzýshylyqtaryn jasaǵany úshin partııa qatarynan shyǵarylǵan.

Búginde 80%-dan astam memlekettik qyzmet avtomattandyrylǵan, elimizdiń barlyq aımaqtarynda Halyqqa qyzmet kórsetý ortalyqtary jumys isteıdi, sıfrlyq tehnologııalar engizilýde, bir tereze prınsıpi boıynsha quqyq qorǵaý qyzmetteriniń ortalyqtary ashylýda.

Qoǵamnyń sybaılas jemqorlyqqa qarsy sanasyn qalyptastyrý maqsatynda, elimizde «Nur Otan» partııasy Sybaılas jemqorlyqty túısinýdiń ulttyq ındeksin engizgen.

Sondaı-aq, sybaılas jemqorlyqqa qarsy is-qımyl jónindegi keńes múshelerine áleýmettik jelilerde belsendilik tanytý, óz jumysyn júıeli túrde jarııalaý mindeti qoıyldy. Bul halyqpen tıimdi keri baılanys arnalaryn qurýǵa múmkindik bermek.