29 Qańtar, 2020 NEWS

Baýyrjan Baıbek: «Nur Otan» partııasynyń mindeti halyqtyń pikirin bılikke jetkizý

«Nur Otan»-nyń Atyraý saparynyń aıtary mol

Baýyrjan Baıbek Atyraýda

«Nur Otan» partııasy tóraǵasynyń Birinshi orynbasary Baýyrjan Baıbektiń elimizdiń munaıly astanasyna jasaǵan jumys saparynyń ekinshi kúni Atyraý qalasynda jalǵasyp, partııanyń oblystyq fılıaly men bastaýysh uıymdary ókilderimen, óńirdiń zııaly tulǵalarymen, qoǵamdyq pikir kóshbasshylarymen jáne oblystyń jastar uıymdarymen bolǵan kezdesýlerdegi keleli áńgimelermen jalǵasty.

Baýyrjan Baıbek bul kúngi sharalardy saıası uıymnyń Atyraý oblystyq aýrýhanasyndaǵy «Yntymaq» bastaýysh uıymy múshelerimen kezdesýden bastady. Oǵan Atyraý oblysynyń ákimi Mahambet Dosmuhambetov te qatysty. 

Dárigerler qaýymymen erkin pikir alysýǵa jol ashqan partııa tóraǵasynyń Birinshi orynbasary óz sózinde partııa músheleriniń eleýli bóligin áleýmettik sala qyzmetkerleri quraıtynyn atap ótip, qarapaıym dárigerler men medısına qyzmetkerleriniń áleýmettik jaǵdaıyn jaqsartý, dárigerlerdiń eńbegin oryndy baǵalaý jaıyna egjeı-tegjeıli toqtaldy. Baıbek

–  Biz dárigerler eńbegin, osy saladaǵy jasalyp jatqan jumystardy halyqqa nasıhattap túsindirýimiz qajet. Adam aýyryp qalsa kimge barady? Dárigerge barady. Adam bilim jınaý úshin kimge barady? Ustazǵa barady. Sondyqtan eń mańyzdy mamandyqtar osy. Dárigerler chellendjin bastaǵan kezde azamattar óz ómirinde dárigerlerge baılanysty oryn alǵan jaǵymdy oqıǵalardy taratsa degen oıym bar. Osynaý mańyzdy mamandyq ıelerin qorǵap, qoldaýymyz qajet, – dedi B. Baıbek.

Sonymen qatar memleketimiz tarapynan medısına salasynda atqarylyp jatqan aýqymdy ister men kórsetilip otyrǵan qomaqty qoldaý da tilge tıek etildi. Onyń aıtýynsha, Elbasy, «Nur Otan» partııasynyń Tóraǵasy Nursultan Nazarbaev partııanyń HVIII Sezinde alǵashqy medısınalyq sanıtarlyq kómekti damytýǵa qosymsha 120 mlrd. teńge bólýdi tapsyrǵan. О́tken jyly Memleket basshysy Qasym-Jomart Kemeluly Toqaev óziniń Qazaqstan halqyna alǵashqy Joldaýynda úsh jyldyq bıýdjet aıasynda densaýlyq salasynyń damýyna qosymsha 2,3 trln. teńge qarjy bólinetinin aıtty. Sonyń nátıjesinde 2019 jyly densaýlyq saqtaý qyzmetkerleriniń eńbekaqysy ishinara 30%-ke kóterildi. Atyraý oblysy boıynsha 8 myńnan astam qyzmetkerdiń jalaqysy ósken. Al 2020 jyldyń qańtarynan bastap dárigerlerdiń jalaqylary orta eseppen 30%-ke ósti.

Dárigerler qaýymymen kezdesýde óńirdegi ózekti máseleler de nazardan tys qalmady. Solardyń qatarynda náresteler ólim-jitiminiń artýy da ataldy. Bul turǵydan oblys elimizde úshinshi orynda tur eken. Baýyrjan Baıbek bul kúrdeli máseleni jergilikti bılik oryndarymen birlese otyryp, ońaltý múmkindikterin qarastyrý qajettigin aıtty.

Kezdesýde dárigerler de tosylmaı, óz usynystary men oılaryn ortaǵa saldy. Solardyń qatarynda jas dárigerlerdiń turǵyn úımen qamtamasyz etý, dárigerlerge pedagogtar sekildi erekshe mártebe berý jaıyn qarastyrý jaıy sóz boldy. Baýyrjan Baıbek bul rette memleket qoldaýynan bólek, árbir azamat óz múmkindigin de shamalap, ózinshe áreket etýi qajettigin alǵa tartty.

– «Jas Otaý» baǵdarlamasy boıynsha ótken jyly jastarǵa 310 páter berildi. Ol – oblystyq deńgeıdegi baǵdarlama. Talantty jastardyń arasynda ár sala boıynsha irikteledi. Jalpy Qazaqstan boıynsha eki jyl ishinde jıyrma bes myń muqtaj azamat páter aldy. Bul rette jastarǵa basymdyq beriledi. Eń bastysy – tabystyń ósýi. Tabys bolsa, ár túrli quraldar bar. Soǵan qarajaty jetetindeı jaǵdaı jasalýda, – dedi partııa Tóraǵasynyń birinshi orynbasary.

Saparyn ary qaraı jalǵastyrǵan Baýyrjan Baıbek óńirdiń zııalylaryna arnaıy at basyn burdy. Eldiń sóz ustar tulǵalarymen bolǵan bul kezdesýdi Atyraý oblysynyń ákimi Mahambet Dosmuhambetov ashyp, júrgizip otyrdy. Keleli bas qosýda óńir rýhanııatyna, mádenıetine, din men tilge qatysty ózekti máseleler qozǵalyp, jan-jaqty talqylandy. О́z sózinde Baýyrjan Baıbek partııanyń maqsaty men mindetterine, mádenıetti, ulttyq qundylyqtardy dáripteý baǵytynda qolǵa alǵan sharalaryna keńinen toqtaldy.

– Bizdiń partııanyń birinshi mindeti – halyqtyń muńyn muńdap, sózin aıtyp, halyqtyń pikirin bılikke jetkizý. Bılik tarapynan kóp nárse jasalyp jatyr. Biraq keıbir kezde bul jasalǵan jumystar halyqqa durys nasıhattala bermeıdi. Sondyqtan barlyq múmkindikterdi paıdalana otyryp, atqaryp jatqan jumystardy halyqqa qarapaıym tilmen jetkizý kerek. Ol – partııanyń ekinshi mindeti. Úshinshi mindeti, árıne, biz naqty isterdiń partııasymyz. Sondyqtan biz negizsiz nárselerdi eshqashan kótermeımiz. Qazirgi kezde ákimdermen birlesip árbir óńirde partııanyń baǵdarlamasyn talqylap jatyrmyz, – dedi Baýyrjan Baıbek.

Jıyn ary qaraı suraq-jaýap túrinde órbip, emen-jarqyn suhbatqa ulasty. О́z kezeginde óńirdiń zııalylary partııa tóraǵasynyń Birinshi orynbasaryna tolǵandyryp júrgen saýaldaryn qoıyp, óz oılaryn búkpesiz ortaǵa saldy. Baýyrjan Baıbek árbir suraqqa egjeı-tegjeıli jaýap berip, keıbireýleriniń sol sátinde sheshimin de qosa usynyp otyrdy.

Bas qosýda Jazýshylar odaǵynyń Atyraý oblystyq fılıalynyń tóraǵasy Q. Jylqyshıev mádenıet salasy boıynsha memlekettik qyzmetke ornalasatyn jandardyń mamandyǵy mádenıet salasynan bolý kerek degen talapty tıisti erejege engizý, aýyldyq klýbtar jumysyn jandandyrý máselesin kóterse, munaı salasynyń ardageri Maqsym Izbasov jergilikti munaıshylardyń jalaqysyn sheteldiktermen teńestirý, óńirdegi ekologııa máselesin ońaltý, Jaıyq ózeni deńgeıiniń jyldan-jylǵa azaıý máselelerin ortaǵa saldy. Al H. Dosmuhamedov atyndaǵy Atyraý memlekettik ýnıversıtetiniń ǵylymı keńesiniń hatshysy, partııa ardageri B. Tynybaeva Atyraý oblysyndaǵy apatty jáne úsh aýysymdy mektepter, balabaqshanyń jetispeýshiligi máselelerin tilge tıek etti.

О́ńir zııalylarynyń pikirlerin den qoıa tyńdaǵan Baýyrjan Baıbek mádenıetke qatysty kóterilgen máselelerdiń partııa janyndaǵy «Mıras» keńesinde qaralatynyn, otandyq munaıshylar jalaqysyndaǵy teńsizdikterge baılanysty el Prezıdenti Qasym-Jomart Toqaevtyń sheteldik jumys berýshiler tarapynan bizdiń azamattarymyzdy kemsitýge jol bermeý týraly másele kótergenin, sol sııaqty qorshaǵan ortany saqtaý máselesinde de Memleket basshysynyń shıkizat energııa sektorynyń jumysynda ekologııaǵa zııandy boldyrmaý kerektigin tapsyrǵanyn aıtty.

– Ekologııa máselesi birinshi ret kóterilip otyrǵan joq. Bul atalǵan máseleniń halyqty erekshe tolǵandyryp otyrǵanyn kórsetedi. О́ıtkeni ekologııa bárine qatysty. Bárimiz de bir aýany jutamyz. Bul másele aımaqtyń aldaǵy damý baǵdarlamasyna mindetti túrde engizilýi kerek, – dep atap kórsetti Baýyrjan Baıbek.

Bilim, urpaq tárbıesi partııanyń erekshe nazar aýdaratyn salalary ekendigine toqtalǵan partııa tóraǵasynyń Birinshi orynbasary oblystaǵy úsh aýysymdy jáne apattyq mektepterdi joıý úshin bes jylǵa arnalǵan Is-sharalar jospary ázirlengenin, aıtylǵan eki usynys ta jaqyn aradaǵy besjyldyqta óz sheshimderin tabatynyn jetkizdi.

О́ńirdiń qoǵamdyq pikir kóshbasshylarymen, blogerlermen jáne BAQ ókilderimen kezdesýde Baýyrjan Baıbek qazirgi tańda jańa syn-qaterlerdi eskere otyryp, kommýnıkasııalardyń zamanaýı tehnologııalaryn paıdalaný arqyly halyqpen dıalog ornatýdyń mańyzdylyǵyna, partııa tarapynan alǵash qolǵa alynǵaly otyrǵan praımerız ótkizý tártibine toqtaldy.

Azamattyq qoǵam ókilderi de sóz alyp, óńirde ózekti bolyp otyrǵan birqatar máselelerdi tilge tıek etti. «Logos Atyraý» qoǵamdyq birlestiginiń tóraıymy Bıbigúl Shaıhıeva Jastardy kásipkerlikke oqytý, «Bylına» orys etno-mádenı birlestiginiń jetekshisi Andreı Korablev Atyraý oblysyna erekshe ekologııalyq mártebe berý usynystaryn ortaǵa salsa, «Qazagstan» Atyraý oblystyq telearnasynyń dırektory, jýrnalıst Qanat Áýesbaıuly ashyq dıalog alańdaryn qurý, memlekettik qyzmetkerlerdiń jýrnalıstermen qarym-qatynasyn arttyrý sekildi máselelerdi kóterdi.

Baýyrjan Baıbek osynda kóterilgen máseleler men usynystar boıynsha tyńǵylyqty jaýap berdi. Onyń aıtýynsha, «Eńbek» memlekettik baǵdarlamasynda eńbek resýrstarynyń biliktiligin arttyrý, jappaı kásipkerlikti damytý máseleleri qarastyrylǵan.

Sapar kestesiniń tyǵyzdyǵyna qaramastan, «Nur Otan» partııasy tóraǵasynyń Birinshi orynbasary Atyraý jastarymen de kezdesýge ýaqyt tapty.

– Qazirgi kezde «Jastar – Otanǵa» baǵdarlamasyn ázirleý qarastyrylýda. Biz muny ár aýdanda talqylap, usynystar jınaqtap jatyrmyz. Ol jastar úshin ózekti tórt máseleni qarastyrady. Birinshi – sapaly bilim. Sapaly bilimsiz eshteńe bolmaıdy. Ekinshi – jumys. Bilimdi bolǵan soń, ýaqytsha emes, turaqty, sapaly jumys bolý kerek. Úshinshi – páter. Páter máselesin sheshýge biz yqpal etemiz. Tórtinshi – jastardyń bos ýaqyty. Mine, osy baǵdarlamany ázirleýge belsendi atsalysyńyzdar, – dedi Baýyrjan Baıbek.

Atyraý óńirine jasalǵan eki kúndik sapardyń sońyna qaraı «Nur Otan» partııasy tóraǵasynyń Birinshi orynbasary Baýyrjan Baıbektiń qatysýymen Atyraý oblystyq fılıalynyń kezekten tys konferensııasy ótti. Konferensııada partııa lıderi Nursultan Nazarbaevtyń kelisimimen «Nur Otan» partııasynyń Atyraý oblystyq fılıalyna osy oblystyń jýyrda taǵaıyndalǵan jańa ákimi Mahambet Dosmuhambetov tóraǵa bolyp saılandy.

О́ńirge jasaǵan eki kúndik saparda Baýyrjan Baıbek elimizdiń munaıly óńirin aralap, shalǵaı aýdandarǵa deıin baryp, qarapaıym turǵyndarmen tikeleı kezdesý arqyly aımaq halqynyń turmys-tirshiligimen keńinen tanysty. Jurtshylyqty tolǵandyryp júrgen máselelerdi anyqtady. Jergilikti atqarýshy organdarmen birge olardyń sheshimin qarastyrdy. Elbasy, «Nur Otan» partııasynyń Tóraǵasy Nursultan Nazarbaevtyń bastamasymen qolǵa alynǵan saıası uıymnyń óńirlerge saparlary ary qaraı jalǵasyp, árbir aımaqqa tán máseleler men erekshelikter esepke alynyp, aýmaqtyq baǵdarlamalarda kórinis tappaq.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir