SIM Qytaıda tarap jatqan belgisiz vırýsqa qatysty málimdeme jasady

Qazaqstannyń syrtqy ister mınıstrligi Qytaıda taralǵan koronavırýsqa qatysty baspasóz jıynyn ótkizdi. Jıynda vedomstovo ókilderi Qytaıǵa barýdy josparlaǵan qazaqstandyqtardy saq bolýǵa shaqyrdy. 

Mınıstrliktiń dereginshe,  Qytaıda paıda bolǵan koronavırýsty juqtyrǵandardyń sany 830-dan asyp, 25 adam kóz jumǵan. 

"Qytaıdyń Ýhan qalasynda qozdyrǵyshy koronavırýstyń jańa túri bolyp tabylatyn pnevmanııa aýrýynyń kóptegen jaǵdaıy tirkelgen. Búgingi kúni juqtyrǵandardyń sany 830-dan asyp, 25 adam kóz jumdy. Qazirgi ýaqytta Qytaıdyń densaýlyq saqtaý organdary osy vırýstyń provınsııadan tys jerlerde keń taralýyn boldyrmaý jóninde tıisti sharalardy qabyldaýda. Ýhan qalasynda jáne Hýveı provınsııasynyń basqa da jaqyn qalalarynda karantın rejimi engizildi. Kólik qatynastarynyń barlyq túrleri toqtatyldy" dedi syrtqy ister mınıstrliginiń ókli Aıbek Smadııarov.

Onyń aıtýynsha, syrtqy ister mınstrligi Qytaıǵa barýdy josparlap otyrǵan Qazaqstan azamattaryna tıisti saqtyq sharalaryn qabyldaýdy jáne epıdemıologııalyq qaýipti joıǵanǵa deıin juqtyryp alý qaýpi joǵary Ýhan qalasy men Hýveı provınsııasyna barýdan ýaqytsha bas tartýdy usynady. Buǵan qosa, adamdar kóp jınalatyn oryndarǵa barýdan aýlaq bolý, jergilikti bıliktiń talaptaryn qatań saqtaý qajet. Al aýrýǵa kúdik týǵan jaǵdaıda dereý medısınalyq mekemege baryp, Qazaqstannyń Qytaıdaǵy elshiligine habarlasý kerek.

Vedomstvo ókiliniń aıtýynsha, Qazaqstannyń densaýlyq saqtaý mınıstrligi SIM-men birlese otyryp, Qytaıdaǵy epıdemıologııalyq jaǵdaıdy muqııat qadaǵalaýda.

- Aýrýdyń elimizge jetip, taralý qaýpin aldyn alý maqsatynda Qazaqstanda sanıtarlyq epıdemııaǵa qarsy jáne profılaktıkalyq sharalar kesheni qaralyp jatyr. Qazaqstandaǵy áýejaılarda sanıtarlyq karantındik baqylaý júzege asyrylýda. Barlyq jolaýshy teplovızor skanerinen ótýde, bul Qytaıdan keletin reısterge kúsheıtildi, - Smadııarov.

Qytaıda taraı bastaǵan koronavırýstar 1960 jyldardan beri belgili. Belgileri ádettegi tumaýǵa uqsaıdy: adam jótelip, entigip, qaltyraıdy, tynys alýy nasharlaıdy.

Dúnıejúzilik densaýlyq saqtaý uıymy jańa vırýsqa baılanysty jahandyq tótenshe jaǵdaı jarııalaý máselesin áli talqylap jatyr.