"Kóligin júrgizbeı qoısa, halyq ashynbaǵanda kim ashynady, Toqaev myrza?!"

Qurmetti, Qasym-Jomart Kemeluly! Bul kúnderi Armenııa, Qyrǵyzstan, Reseı elderinen avtokólik ákelgen Qazaqstan azamattary sergeldeńge túsip, qınalyp júr. "Arqada qys jaqsy bolsa, arqary aýyp nesi bar?!" demekshi, eger de, elimizde sapaly, ári arzan kólik satylatyn bolsa, halqymyzdyń shetel asyp, kólik tasyp nesi bar?!

Sońǵy málimet boıynsha, Qazaqstanǵa 175 myń-200 myń arasynda sheteldik kólik ákelingen. Kóbi Armenııa elinen kelgen kólikter. Ortasha baǵamen, bir kóliktiń quny 3 mıllıon teńge bolsa, 200 myń kóliktiń quny 600 mıllıard teńge eken. Qazaqstan azamattarynyń 600 mıllıard teńgesi kólik shyǵarmaıtyn Armenııa sııaqty elderge túsip, sol elderdiń ekonomıkasyn kóterip, halqynyń jaǵdaıyn jaqsartty. Bizdiń elde nege solaı jasamasqa, bárimiz de sol kedendik odaqtyń múshesi emespiz be?

Elimizdegi qurastyrlatyn jańa kólikter óte qymbat, halyqtyń alýǵa múmkindigi joq. Sonda halyq ne isteý kerek? Qarapaıym halyqtyń kóbi úkimetke qol jaımaı, sol ákelgen kóliktermen taksı bolyp, bala-shaǵasyn asyrap júr.

Halyqtyń kóligin arzan baǵaǵa zańdastyryp, Qazaqstan Respýblıkasynyń memlekettik nomerin berýge ne kedergi? Zań ba? Zań halyq úshin shyqpaı ma? Halyqty qınaıtyn zańnyń, óz halqymyzǵa tıimsiz kedendik odaqtyń bizge ne keregi, qandaı qajeti bar? Halyq mańdaı terin, taban aqysyn, tógip júrip qarjy jınap, jetpegen jerine bankten nesıe aldy. Adal eńbegimen alǵan kóligin zańsyz dep júrgizbeı qamap qoısa, halyq ashynbaǵanda, kim ashynady? Halyq kóshege shyqpaǵanda, kim shyǵady? Elimizge 200 myń kólik kirdi, ár úıde 5 adam bolsa, 200 myń úıde 1 mıllıon adam turady.

Sizder kórshiniń kóńiline qaraımyz dep, bir mıllıon adamnyń jep otyrǵan nanyn tartyp alyp, óz halqymyzdy sendeltip qoımaqsyzdar ma?! Halyq ashynbasa, qańtardyń qaqaǵan aıazynda kóshege shyǵyp nesi bar? Keıbir sheneýnikter: "Bul jaǵdaıǵa halyqtyń ózi kináli" dep aqtalýda. Bizdiń úkimet bárin bilip, kórip otyryp, shetelden ákelingen kóliktiń sany 10 myńǵa, 20 myńǵa jetkende nege toqtatpady? Nege, zańsyz dep sol kezde tyıym salmady? Sol kólikterin bizdiń ákimder de, polısııa qyzmetkerleri de ákeldi emes pe? Halyq solardy kórdi, solarǵa sendi ǵoı.

Qurmetti, Qasym-Jomart Kemeluly! Siz bankte nesıesi bar 500 myń qarapaıym halyqtyń qaryzyn jaýyp, eldi bir qýantyp edińiz, endi óz halqyńyzdyń shetelden ákelgen kólikterin zańdastyryp, olarǵa Qazaqstan Respýblıkasynyń nomerlerin berip, 1 mıllıon halqyńyzdy taǵy da qýantyńyz! Biz sizge senemiz! Alla bizdi senimnen, sizdi abyroıdan aıyrmaǵaı! Táýelsizdigimizdi máńgi, halqymyzdy baqytty bolǵaı!