Qazaqstanda mal eksportyna tyıym salyndy

Qazaqstanda mal eksportyna tyıym salyndy. Bul týraly búgin, 20 qańtarda eldiń aýyl sharýashylyǵy mınıstrligi habarlady. 

Mınıstrliktiń málimdeýinshe, mal eksportyna tyıym salýǵa et baǵasynyń qymbattaýy sebep bolǵan.

- Maldyń jappaı eksporttalýy et baǵasyn ósirdi. Shıkizat tapshylyǵynan Qazaqstannyń et kásiporyndary men bordaqylaý alańdary tolyq jumys isteı almady. Olardyń tolyq jumys istemeýiniń negizgi sebebi maldyń jappaı eksportynyń saldarynan shıkizat tapshylyǵy boldy, - delingen mınıstrlik habarlamasynda. 

Mınıstrliktiń málimetinshe, ótken jyly Qazaqstannan shetelge 156 myń bas iri qara mal shyǵaryldy. Olardyń basym kópshiligi – 78 paıyzy О́zbekstanǵa, 14 paıyzy Armenııaǵa eksporttalǵan.

Al usaq maldardan elden 264 myń bas qoı shyǵarylǵan, onyń jartysynan astamy analyq bas. Usaq maldyń basym bóligi, ıaǵnı 200 myńnan astamy (76%) О́zbekstanǵa, 21,5 myń bas (8,1%) Reseıge, 18 myń bas (6,7%) Ázerbaıjanǵa jáne shamamen 12 myń bas (4,5%) Iranǵa tasymaldanǵan.

Aýyl sharýashylyǵy mınıstrligi mal eksportyna tyıymdy agro ónerkásip keshenin damytýdyń 2017 - 2021 jyldarǵa arnalǵan memlekettik baǵdarlamasymen baılanystyrady. Bul baǵdarlama boıynsha qaıta óńdelgen ónim eksporty 2,5 esege ulǵaıýy tıis.

Qazaqstanda 2019 jyly 21 qazanda da mal eksporttaýǵa shekteý qoıý týraly buıyryq shyqqan. Ol kezde tek analyq mal basyn eksporttaýǵa ýaqytsha tyıym salynǵan edi. Mınıstrliktiń habarlaýynsha, sol shekteý qujatyna jańa ózgerister enip,  endi barlyq iri qara jáne usaq maldar jasy men jynysyna qaramastan shetelge tasymaldanbaıdy. 

"Atalǵan buıryqqa ózgerister engizý taıaý jyldary Qazaqstanda mal basyn saqtap, ulǵaıtýǵa, otandyq et kombınattaryn qolaıly baǵamen, sapaly shıkizatpen qamtamasyz etýge jáne daıyn óńdelgen ónimniń óndirisi men eksportyn arttyrýǵa múmkindik beredi" deıdi aýyl sharýashylyǵy mınıstrligi.