Abaıdyń 175 jyldyǵyna qansha qarjy jumsalatyny belgili boldy

Aqyn Abaı Qunanbaıulynyń 175 jyldyq mereıtoıyna arnalǵan is sharalarǵa jumsalatyn qarajat sommasy belgili boldy. Bul týraly búgin, 16 qańtarda Nur-Sultanda ótken baspasóz jıynynda mádenıet jáne sport vıse-mınıstri Nurǵısa Dáýeshov málimdedi. 

Onyń aıtýynsha, aqynnyń mereıtoıyna jumsalatyn qarajat mádenıet jáne sport mınıstrliginiń jyldyq bıýdjetinen bólinedi.

– Negizi, barlyǵy jyldyq jospar aıasynda ótedi. Osylaısha, Abaı babamyzdyń 175 jyldyǵyna arnalǵan barlyq sharalarǵa 3 mıllıard teńgege tarta aqsha jumsalady. Ol – josparly qarajat. Mysaly, Abaı atyndaǵy opera teatrynyń gastroldik saparlaryna bólinetin qarjy bolady. Olar sol qarjyny Abaıdyń mereıtoıyna arnap, Máskeý, Túrkııa men Qytaıǵa barady. Basqa óner ujymdary da solaı istep otyr, – dedi Dáýeshov.

Vıse-mınıstrdiń sózine qaraǵanda, bıýdjettiń ishinde Abaıdyń ómiri men shyǵarmashylyǵyna arnalǵan úsh derekti fılmniń qarajaty da bar. Budan bólek, Parıjde IýNESKO aıasynda birqatar shara uıymdastyrylady.

Mereıtoı aıasynda Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-qoryǵyn túrlendirý jáne aqyn esimimen baılanysty tarıhı-mádenı mura obektilerine ǵylymı-restavrasııalaý jumystaryn júrgizý qarastyrylǵan.

– Bul jumystardyń bári "Qazrestavrasııa" uıymyna bólingen qarajat esebinen isteledi. Mysaly, Abaıdyń Semeı qalasyndaǵy mýzeıiniń ishki jóndeý jumystaryna 30 mln teńge bólindi, – dedi vıse-mınıstr.  

Uly Abaı mereıtoıynyń resmı saltanatty ashylý rásimi 21 qańtar kúni Nur-Sultan qalasynda ótedi.

2019 jyly 30 mamyrda Qazaqstan prezıdenti Qasym-Jomart Toqaev 2020 jyly Abaı Qunanbaıulynyń 175 jyldyq mereıtoıyn atap ótý týraly jarlyqqa qol qoıdy. Al osy jyldyń 9 qańtarynda  "Egemen Qazaqstan" gazetinde Toqaevtyń "Abaı jáne HHI ǵasyrdaǵy Qazaqstan" atty maqalasy jarııalanǵan bolatyn. 

Abaı (Ibrahım) Qunanbaıuly – qazaq jazba ádebıetiniń negizin qalaýshy ári klassıgi. Ol – júzdegen óleń, poema men aýdarmanyń, fılosofııalyq traktattar stılinde jazylǵan "Qara sózderdiń" avtory. Sonymen qatar onyń 10-nan asa áni men kúıi bar.