Toqaev birqatar kadrlardy ózgertti

Qazaqstan prezıdenti Qasym-Jomart Toqaev 15, 16 qańtarda birqatar kadrlardy ózgertti. Toqaevtyń kadrlardy qyzmetinen bosatý týraly jarlyǵy men taǵaıyndaý týraly ókimin Aqorda saıty habarlady.

Aldymen 15 qańtarda Toqaevtyń ókimimen Rashıd Jaqypov ishki ister mınıstriniń orynbasary qyzmetinen bosatyldy. Aqordanyń jazýynsha, Jaqypovtyń  qyzmetinen bosatylýyna sebep – onyń zeınet jasyna tolýy. Jaqypovtyń ornyna ishki ister mınıstriniń orynbasary qyzmetine kimniń baratyny áli habarlanǵan joq. 

16 qańtarda prezıdent memlekettik kúzet qyzmetiniń bastyǵy Ánýar Sadyqulov pen onyń orynbasary Ázimhan Júsipovty qyzmetinen bosatty. Toqaev Sadyqulovty Ulttyq qaýipsizdik komıteti tóraǵasynyń orynbasary – "A" arnaýly maqsattaǵy qyzmetiniń dırektory etip taǵaıyndady. Al onyń ornyna memlekettik kúzet qyzmetiniń bastyǵy etip segiz jyl ishki ister mınıstri bolyp, 2019 jyldyń naýryzynan bastap prezıdentiniń kómekshisi – qaýipsizdik keńesiniń hatshysy qyzmetin qosa atqaryp kelgen Qalmuhamet Qasymovty qoıdy. Qasymov atqarǵan qos qyzmetke kimniń taǵaıyndalǵany áli jarııalanǵan joq.