Qazaqstan ishki ister mınıstrligi qylmystyq atqarý júıesi komıteti Almatydaǵy tergeý ızolıatorynda "jumbaq jaǵdaıda kóz jumǵan" Erkebulan Nurmyhanovtyń ólimine baılanysty túsinikteme berdi.

Komıtettiń habarlaýynsha, Nurmyhanov ókpe-júrek aýrýynan qaıtys bolǵan. 

"Sot-medısınalyq saraptamaǵa sáıkes, tutqyn ókpe-júrek aýrýynan qaıtys bolǵan. Bul fakti boıynsha qajetti tekserý jumystary taǵaıyndaldy" dedi qylmystyq atqarý júıesi komıteti ókilderi. 

Olardyń aıtýynsha, tutqyn Qylmystyq kodekstiń 200 ("Kólik quralyn zańsyz ıemdený") jáne 192-baptary ("Qaraqshylyq") boıynsha kúdikke ilingen.

Buǵan deıin 14 qańtarda Almatynyń LA-155/18 tergeý ızolıatorynda 19 jastaǵy Erkebulan Nurmyhanov esimdi tutqyn jumbaq jaǵdaıda kóz jumǵany habarlanǵan. 

Tergeý ızolıatory dárigerleriniń sózinshe, Nurmyhanovtyń dene qyzýy kóterilip, oǵan analgın jáne dımedroldan ýkol salynǵan. Ýkoldan keıin tutqynnyń jaǵdaıy tipti múshkildengen, jedel járdem kelgenge deıin ólip ketken.

Al týystary tergeý ızolıatory ókilderiniń sózine kúmán keltirgen. Olardyń aıtýynsha, tutqynnyń dárige allergııasy bolmaǵan. Máıitti taný úshin máıithanaǵa barǵan kezde olar Nurmyhanovtyń denesiniń oń jaǵy, beti men basy da kókpeńbek daqtarǵa tolyp ketkenin baıqaǵan. Iyǵynan jaraǵa uqsas iz bilingen.

Nurmyhanov 14 qarashada eki aıǵa qamaýǵa alynǵan. 14 qańtarda túrmede otyrý merzimi bitýi tıis bolǵan.

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir